[‘Maria suyuer kersouwe’] Op die wyse, Ic had een ghestadich minneken.  Maria suyuer kersouwe  Moeder ende maghet fijn  O alder ghenadichste vrouwe  Der sondaren medecijn  Bedwingt dat vleesch mijn  Aen v staet mijn betrouwen  Wacht mij vanden eewighen rouwe  Ende v dienaer sal ick sijn.     Bij Iesum sydij verheuen  Al door v gratie soet  De ghenaede is onbeschreuen  Die ghij den sondaers doet, [p. lxxi]    Verwerft nv metter spoet  Dat mijn sonden my worden vergeuen  Hier nae dat eewich leuen  Der zielen dat eewich goet.     Ick ben een vat vol sonden  Van sonden ben ick onreyn  Geen sondiger en was oyt vonden  Dat ken ick voor v certeyn  Dies alder waertste greyn  Door v kints bloedighe wonden  Verwerft my tot allen stonden  Ghenade in tshemels pleyn.     Wat baten ist dat ic bekinne  Mijn sonden ende alle mijn quaet  Ten sij dat ick const verwinnen  Mijn herte wort desperaet  Dus voor mijn swaer misdaet  O hemelsche Keyserinne  Al door v vierige minne  Aen Iesum voor my gaet.     Princersse roose sonder doren  Mijn sonden sijn my leet  Van Godt sydi vercoren  Ick stincke doort sondich sweet  Maria door v liefde heet  En laet my niet verloren  Noch in mijn sonden versmoren  V te dienen ben ick bereet.  Amen.