[‘Hoort hoe Christus na Galileen’] Een gheestelijck Liedeken op die wyse. O radt van auonturen.  Hoort hoe Christus na Galileen  Track wt dat Iootsche lant  Om dat hem die Pharizeen  Benijden aen elcken kant  Door Samarien moeste hij wesen  Daer hij bij een fonteijne quam,  Die Iacob alsoo wij lesen, [p. cviij]    Gaff Ioseph sijnen sone ghepresen  Daer Iesus sijn rusten nam.     Sijn discipulen ghetrouwe  Ghinghen spijse coopen al tot Sychar  Een Samaritaensche vrouwe  Quam om water te putten daer  Want Iesus bleef daer alleyne  Ende hij sprack dat vrouken toe  Gheeft mij wt ionsten reyne  Een droncxken waters cleyne  Want hij was van gaen soo moe.     Hoe begeert ghij van mij dus Heere  Te drincken sprack tvrouken ient  Want die Ioden in gheenen keere  Den Samaritanen en comen omtrent  O vrouken sprack Christus verheuen  Kende ghij Godts ghiften soet  Ghij soudt hem om water aencleuen  Ende hij soude v water gheuen  Dwelck eewelijck leuen doet.     Wat water soude dit wesen  Sprack dat vrouken goedertier  Sijt ghij bouen Iacob ghepresen  Want hij haelde sijn water hier  Christus sprack hem sal noch dorsten  Die van dit water drinckt  Maer in wijen myn water mach rusten  Hem en sal niet meer drinckens lusten  Twelck int eewich leuen springt.     Wilt my van dat water schincken. [p. cix]    Sprack tvrouken tot Christum saen  Christus sprack wilt v bedincken  Ende roept my uwen man  Tvrouken sprac nae Ioannes bescrijuen  Gheenen man en heb ick soo ghij siet  Christus sprac om deucht te verstijuen  Ghij hebter gehadt tot vijuen  En die ghij noch hebt en is uwe niet.     Heer ghij sijt een propheet  Sprack tvrouken hoort dit vermaen  Ghij segt my wat ic int secreet  Binnen my seluen hebbe misdaen  Waer moetmen Godt aenbidden  Op den berch oft te Ierusalem fijn  Segt mij Heere vol wijsheden  Want hieromme die Ioden vol onvreden  Op die Samaritanen zyn.     Ghij en weet niet sprack die heere  Wij ghij aenbidt oft vreest  Wij Godt bidt tsijnder eere  Moet bidden inden geest  Doen sprack die vrouwe vol vramen  Ick gelooue dat ghij Messias zijt  Met dien zyn discipulen quamen  Meester eedt seyden sy altesamen  Christus hadde anderen appetijt.     Het vrouken is sonder sparen  Rasch nae die stadt gegaen  Sij liep al omme openbaren  Ende haer cruycke liet sij staen [p. cx]    Wat haer geschiet was ginc sij ontknoopen  Als tvolck dit hadde ghehoort  Het quam met grooten hoopen  Neerstich wt die stede geloopen  Ende geloofden aen Christum voort.     Ghij Christenen in allen hoecken,  Betrout in Christus naect  Wilt in hem v salicheijt soecken  Dats die spijse daer hij nae haeckt  Den oogst is nu voor oogen  Die vruchten staen al wit  Wilt Christo liefde tooghen  Ende uwen naesten te helpen poogen,  Soo dat ghij zijn eewich rijck besidt.