[‘Compt al van Zuijden ende Oosten’] Een nieu gheestelijck liedeken op die wyse. Die vogelkens inder muyten.  Compt al van Zuijden ende Oosten  Die met sonden zyt beladen  Ick sal v selfs vertroosten  Met mijn vleesch sal ick v versaden  Ick ben die fonteyne verheuen  Die dorst heeft die come naer  Die daer wt drinckt sal eewich leuen  Spreect Christus int openbaer.     Ic en ben hier niet ghecomen  O menschen sijt des vroet  Dat ick v soude verdoemen  Maer verlossen met mijn bloet  Ic begeer in v herte te woonen [p. cxi]    Ende ter salicheijt brengen in  Soo moet ghij op mij steunen  Oft ghij en compt niet daer ick bin.     Ick ben den wijnstock geschoten  Spreect Christus verstaet mijn woort  Blijft vast in mij gesloten  Ghij sult brengen goede vruchten voort  Maer laet ghij v verleyden  Dat ghij des werelts trooste aensiet  Soo wordij vanden wijnstoc gesneden  Al v vruchten en doogen niet.     Hebt lief ende wtuercoren  Die v ter werelt doen quaet  Die v boosheijt leggen te voren  Bidt daer voor tis Christus raet  Want Godt heeft selue gesproken  Aent cruyce met luyder stem  Och vader latet ongewroken  Ick bidde vergeuet hen.     Wilt niet vreesen altesamen  Mijn woorden de werelt belijt  Oft ick sal my uwer schamen  Voor mijnen Vader gebenedijt  Aldus en wilt niet vreesen  Maer strijdt met herten vro  Laet den knecht ghelyck den meester wesen  Het belieft den sone alsoo     Ick ben een goet herder wter maten  Ick gae mijn schapen voor [p. cxij]    Ic begheer mijn leuen daer voor te laten  Ic ben die rechte door  En laet v niet verleyden  Die buyten der deuren passeert  Het zyn dieuen en moordenaers beyde  Spreect Christus soo hy ons leert.     Niemant en compt totten vader  Dan door den soon Gods verheuen  Hij bidt voor ons alle gader  Om ons te bringhen int eewich leuen  Wilt dan op hem betrouwen  Hij is die verworpen steen  Doet ghijt niet het sal v berouwen  Als ghij van hier sult scheen.     Prince Godt siet ons allenden  Hier in dat aertsche dal  Wilt uwen gheest neder senden  Die ons vertroosten sal  Dat wij eere mogen bewijsen  Godt ende ons mede broeder,  Soo mogen wij mede verrijsen  Met Godt ende sijn lieue moeder.