[‘Wie wilt hooren een nieu liet’] Een nieu liedeken op de wyse. Een vrouken heb ick seer bemint.  Wie wilt hooren een nieu liet  Dat sal ick singhen met desen  Van een groot mirakel dat is gheschiet  Nae dat Christus was verresen  Al tot Godts glorie en onse leer  Willen wij dit werck aenmercken  Godt sij lof prijs en eer [p. cxij]    Nv en immermeer  Van sijn hoochdadige wercken.     Petrus en ses discipulen ontrent  Sijn visschen gegaen bij nachten  Heer Iesus en wasser niet present  Daerom te vergheefs sij vrachten:  Also als Godt het sijne niet daer toe en doet  Laet visschen alle pastooren  Bicht vaeders en predicanten goet  Men doet geen boet  Godt moet open doen die ooren.     Smorghens vroech quam Iesus staen  Opden oeuer, ons tot een leere  En vraechden oft sij niet en hadden geuaen  Sy antwoorden neen wij heere  Hij sprack werpt het net ter rechter handt  Werpt wt ghij en sult niet misschen  Petrus worp wt, ende trock aent lant  Sijn net daer hij in vandt  Hondert en drijen vijftich groote visschen.     Als Godt sijn benedictie stort  Int herte der menschen coene  Als dan sprinckt het Euangelie vort  Als en spruijtken ionck en groene  Als Godt wilt roepen tvercoren getal  En in sijn dienaers preken  Al sijnse verspreyt ouer al het swerels dal  Niet een en sal  Van haer mogen gebreken.     Niet een onder soo grooten ghetal [p. cxiij]    En sal cleyn worden gheuonden  Als Petrus ten oeuer trecken sal  Sijn net al wt den gronden  Sij sullen al sijn groot en perfeckt  Als sij sullen comen te lande  Diemen hier nv als cleyne versteckt  Als dwaesen begeckt  Met schimpen menigerhande.     Doen Petrus vischten op een ander stont  Betrouwende op Christus woorden  Het schipken ginck by nae te gront  Die visschen dat nette schoorden  Die groote die beten de cleyne doot  Dit en sachmen hier niet ghebeuren  Hier en heeft Petrus geen sinckens noot  Die visschen groot  En doen het net niet scheuren     Soo langhe als Christus opt twater leert  Soo vancktmen visschen met hoopen  Daer comender soo veel als ghij begheert  Elck wilt hem laeten doopen  Maer als sij in het net ghesloten sijn  Beghinnense den stert te rueren  Den grooten duncket te wesen pijn  Gheuanghen te sijn  Inder heyliger kercken mueren.     Maer als den nacht sal sijn vergaen  Den ioncsten dach opgheresen  Sal Christus op den oeuer staen  Met alle sijn wtgelesen [p. cxiiij]    Dan en sal wten net springen cleyn oft groot  Want sij sullen de zee versmaeden  Sij en sullen niet vreesen noch sieckte noch doot  Want themels broot  Dat salse van weelden versaeden.     Prince houdt v stille in sint Peeters net  En wilt niet springhen noch tieren  Al woordy byde quade ghepackt verplet  Alleen wacht v van haer manieren  Schaut quade visschers bouen allen quaet  Dat ghij van haer niet en wort geuanghen  Want crijghen sij v bruylofts ciraet  V gheloof door boosen raet  Soo coomdy int eewich verstranghen.