Een nieu liedeken  Hoort toe altesamen bidt ende waect  Want wij nae Godts belde sijn gemaeckt [p. cxvij]    Ende wilt opheffen v ooghen  Want ghij nv den dach des Heeren naeckt  Dien druck moetmen ghedooghen.     Het volck sal teghen malcander opstaen  Die Vader sal sijn kint afgaen  Ende tkint den vader versteken  Ghelijck voor die diluuie elck was belaen  Vol boosheyt ende vol ghebreken.     Als dan die boosheyt menichfout  Seyt Christus sal hebben in ionck ende oudt  Die ouerhant ghenomen  Die liefde sal worden in veel herten cout  Merct oft dit niet en is volkomen:     Wat doen wij al om daertsche goet  Dat in die werelt verrotten moet  Oft die motten sullen eten  Dat ons een dief steelt metter spoet  Daer wij Godt mede vergheten.     Christus ghinck voor ons inde doot  Waer helpen wij malcanderen wter noot  Al hooren wij Christus leden karmen  Daer en is compassie in cleyn noch groot  Elck sluyt sijn borse voor den armen     Noch siet ghij vande hoochste s[ti]el  Tot die neerste toe ist al rebel  Om deucht doen en wil niemant pooghen  Iae Godt seyt daer en doet niet een wel  Sij worden al van mijn ghedooghen.     Wat dobbelen, tuysschen, wat ouerdaet  Wat hoouerdye is nv in elcken staet [p. cxviij]    In spijse in dranck in cleeren  Soo wtwendich dat het volck nv gaet  Men kent geen schamel voor heeren.     Hoe moghen wij sijn dus seer verblint  Dat wij Gods liefde soo excellent  Om daertsche saken laten varen  Die ons niet en gheuen dan torment  En met die eewighe doot beswaren.     Wat mach den mensche baten, dat  Hij crijcht { seyt Christus } al tswerelts schat  Als hij sijn siele laet bederuen.  Al waert dat ghij duysent werelden hadt  Ten helpt al niet als ghij moet steruen.     Waer is Antiochus, waer mach hij sijn  Holofernes ende Alexander fijn  Die eens die werelt al verwonnen  Wat hebben sij daer aff op dit termijn  Vercreghen dan een hant vol sonnen.     Dus die werelt soo sint Jan v raet  Ende alle wereltlijcke saken haet  Daer en leet niet in dan hoouerdie  Haet ende nijt, en ghiericheyt versmaet  En alle oncuyssche boeuerije.     Dus wilt v neerstelijck spoyen  Die leden Christi bijstant te doen  Wt liefden die hant wt steken  Van spijse van dranc, van cleeder, en schoen  Oft wat hun mach gebreken.     Amen.