[‘Ick sie die morgen sterre’] Dit liedeken gaet alst begint.  Ick sie die morgen sterre        De bruyt.  Heer Iesus claer aenschijn  Ick groet v sonder merren  Met alder herten mijn     Och wie mach ick daer hooren        De bruydegom.  Maken soo soete ghebaer  Het luydet in mijn ooren  Oft een gulde herpe waer.     O siel wildi mij winnen  Ende mij bekennen bat  Ende mij daer mede ghewinnen  Ick ben uwer zielen schat.     Iesus lief vercoren        De bruyt.  Mijn troost mijn toeuerlaet  Verleent mij al te voren  Te volgen uwen raet     Wildij bij rade leuen        De bruydegom.  So laet ws selfs raet  Ende wilt al dat begeuen  Daer uwen quaden sin toe staet.     Sijn dit die naeste wegen        De bruyt.  Soo ben ick seer veruaert  Natuer en wils niet pleghen  Het is haren rechten aert.     O siele staet op v oogen        De bruydegom.  Siet aen mijn bitter pijn,  Mijn edel bloet verdroogen [p. cxxiij]    Salt dus verloren sijn.     Wildij mij niet begheuen        De bruyt.  Iesus mijn gulden pont  Soo wil ick v al mijn leuen  Draghen in mijnen gront.     O ziele soude ick v laeten.       De bruydegom.  Neen ick in gheender stont,  Ick ben om uwer baeten  Ter doot toe seer ghewont.     O Heer v bedructe tranen        De bruyt.  Gheeft mij door v ootmoet,  Dat ick mits v vermaenen  Vercrijghe dat eewich goet.     O siele ontfangt die croone        De bruydegom.  Mijn trou die gheue ick dij,  My sult ghij hebben te loone  En scheyt v niet van my.