Een gheestelyck Liedeken  Och Godt dat ic oyt sonde dede  Dat mach mij nv wel rouwen  Ick heb dese werelt soo lang gedint  Sij scheen mij vrint  Ick en vantse noyt ghetrouwe.     Nv wil ic gaen de werelt laten  Van sonden wil ic mij wachten  Wat ick bestae sij volcht mij na [p. cxxlvi]    Waer dat ic gae  Bij daghen en oock bij nachten.     Dan comt die vyant en mijn vlees  Sij quellen mij soo seere  Hij brengt mij soo menighen swaren leys  In mijn ghepeys  Och helpt mij rijck Godt heere.        Rijck godt.     Helpt mij dat ick verwinnen mach  Och Iesus soete heere  Al sijn mijn sinnekens nv verbaest  Helpt mij o laes  Ic hoop sij sullen noch keeren.     Een cruys van xv. voeten lanck  Heeft hij voor ons gedragen  Ick en vanter geen trouwe in geenen man  Meer dan in hem  Dat en derf mij niemant vragen.     Caluarien is een paleys soo schoon  Daer wil ick mij gaen vermeyden  En rusten mij al onder des cruycen boom  En hij is soo schoon  Mijn lief wil ic daer verbeyden.        Daer verbeyden.     Die teeken die sijn wtgespreyt  En die rooskens die staen open  Myn liefken reyct wt sijn armkens bloot  Aenden cruyce root  In hem staet alle mijn hopen.        Alle mijn hopen.     Op hem te dincken, op hem te peysen  En es niet al verloren  Mijn liefken draget een cranselijn [p. cxlvij]    Dat doet hem pijn  Ten syn niet dan scherpe doren.        Scherpe doren.