[‘Ic weet een suyuerlycke’] Een gheestelyck nieu Liedeken op die wyse: Ick had een ghestadich, &c.  Ic weet een suyuerlycke  Geen schoonder die aerde en heeft  Sy woont in hemelrijcke [p. cliij]    In weelden dat sij leeft  Soo wie dat haer lief heeft  En dienen haer met trouwen  Die schoonste bouen alle vrouwen  Die haer dienaers niet en begeeft.     Twee vrindelijck oochskens draecht sij  In allen haer dienaers noot  Daer mede soo veriaecht sij  Allen druck en teghenspoet  Och edel maget soet  Wilt doch mijnder ontfermen  Aensiet mijn suchten en kermen  Als ick eens steruen moet     Ic en can niet vergheten  Haer groote ootmoedicheyt  Ten waer niet wt te spreken  Haer suyuer reynicheyt  Ick wete wel hoe sij heet  Die mijn herteken heeft bevanghen  Nae haer staet alle mijn verlanghen  Tot inder eewicheyt.     Wt Dauidts gheslachte geboren  Vander eewicheyt voorsien  Wt alle maechdekens vercoren  Wat eer mocht ick haer bien  O Maria maget puere  Propheten van goeden leuen  Die hebben van v gescreuen  Soo menige schoon figure.     Och gloyende Moyses doren [p. cliiij]    Die brant en niet en verbrant  Schoon roose sonder doren  Al in dat coren gheplant  Weest doch mijn onderstant  En wilt doch voor mij spreken  Als mij mijn herte sal breken  Reyct mij v ghenadige hant.     O alder schoonste duyue  Noyt men so schoon en vant  Reyn taxken van olijue  O duyue die v gewan  Die wter arcken quam  Prijs hebt ghij ons verworuen  Hij es voor ons gestoruen  Die ons dat leuen gan.     Schoon Arons roede bloyende  Reyn maechdelijcke greyn  Fonteyn der minnen vloyende  Al in des hemels pleyn  Rust ghij altijt certeyn  Soo wilt doch voor mij spreken  Als mij mijn herteken sal breken  V dienaer wil ick sijn.     Reijn balsem gaerde ghepresen  Ghij riect als nardus soet  Want ghij condt al ghenesen  Des sondaers wonden groot  Al waren sij totter doot  Als hij die sonden wilt laten  Soet bouen honich raeten [p. clv]    Helpt ghij hem inden noot.     O suyuer lelie reyne  Noyt smette in v en quam  Een hert sach v alleyne  Seer rasch dat hij tot v swam  Het is geworden tam  Het liet hem iaghen en drijuen  Het woude by v blijuen  Oftet waer gheworden lam.     O Maria die schoonste vrouwe  Wyens ghelijck noyt man en vant  Ick bid v op rechter trouwe  Als ick moet int vreemde lant  Daer ick ben ombekant  Wilt doch mijn leydster wesen  O maghet wtghelesen  Doet mij dan onderstant     O Maria die schoonste kersouwe  Met hemelschen daw bespreyt  O alder claerste vrouwe  Ghij verwint den vyant wreet  Verdrijft doch allen mijn leet  En wiltse bij v bringhen  Al die dit liedeken singhen  Want Godt v geerne verhoort. Amen.