Een schoon gheestelyk Liedeken  Laet ons met sangen nv gaen verblijden  Den Heere belijden ghij volck van Israel  Hoort mijn geboden seyt Godt tot alle tijden  Ick sal v bevrijden, ick ben v Godt en niemant el  En soect geen ander Goden ick segt v wel  Alle ander Goden die heb ic v verboden  De selue te eeren met sanghe en met spel.     Israelsche kinders wilt mij aenbeden  En v besteden in mijn ghebot vayllant  Ick ben v hooft ghij sijt mijn leden  Leeft met vreden mijn volck alsoo playsant  Ick heb v ghebrocht wt Egypten lant  Cost ghijt beseffen, ghij soudt mij verheffen  Bouen alle gout oft costelijcken pant. [p. clxvij]    Dits mijn ghebot wilt hier nae vierich haken  Bouen alle saken ghelooft die woorden mijn  Ghij en sult geen vreemde Goden maken  Om voor v te waken ben ick die heere dijn  Paulus die seyt dat al afgoden dienaers sijn  Die de werelt aenhanghen  Met giericheyt beuanghen  Schouwet sulck verstranghen  Ghelijck ghij sout fenijn.     Die de werelt met haer wellusten aenschouwen  Ende die op haer betrouwen, sullen als stoff vergaen  Ghelijck sij quamen in sdoots benauwen  Die met Madians vrouwen teghen mij hebben misdaen  Dus op mijn woorden alleen wilt staen  Van druck en lijden so sal ick v beurijden  En met v strijden  Hout ghij mijn soet vermaen.     Ick ben v vader ghij moet met mij leuen  Hoe soudick v begheuen mijn kinders al ghemeyn  Wij in mij gelooft, hij en sal niet sneuen  Want ick sal hem gheuen mijn rijcke certeyn  En hij sal wercken doort ghelooue reyn  Die mij eere bewijsen, die sal ick mede prijsen  Bij mijnen vader al in des hemels pleyn.     Ick ben den steen daer ghij al moet wt drincken  Ick wil v schincken wt liefden mijnen gheest  Om dat ghij soudt mijns naems eewich gedincken  Niemant crincken smaeckt mijnder woorden keest [p. clxviij]    Hoe ghij sult spreken en weest niet bevreest  Alsmen v sal stieren  Voor Coninghen ende Princieren  Ick sal uwen mont regieren  Om tantwoorden minst ende meest.     Ick ben een Prince wilt mij behagen.  En wilt niet versaghen Dat seg ick v voorwaer  Ghij moet mij mijn cruyce helpen draghen  In alle laghen, al vallet v dicwils swaer  Allen v lijden dat gaet mij alsoo naer  Als den appel mijnder ooghen  Dus wilt al ghedooghen  Want gij sult aenschouwen mijn lieffelijck aenschijn claer.