[‘Och wilt aenmercken ghy weeldige herten’] Op die wyse. Mishouwet so is den name myn.    Och wilt aenmercken ghy weeldige herten  V crancke natuere die sterffelyck is  En doet ghys niet het sal v smerten  Als comt die doot die vreeselyck is [p. clxx]    Hier om soo wilt v spoyen  Die werelt te verfoyen  Ick leert v als die wijse doet  Wat batet al als ick steruen moet.     Steruen so moeten wij arm en rijcke  Wat willen wij ons vermeten dan  Die pijne der hellen sal dueren eewelijcke  Hij is wijs diet bevroeden can  Want dansen ende springhen  Het sijn al verganckelijcke dinghen  Die doot neemt ons het leuen soet.        Wat batet.     Bereyt v huys in corter stonden  Of die doot sal v den wech ondergaen  Och wee den ghenen die dan steruen in sonden  Die sullen dan loon nae haer wercken ontfaen  Als die ooghen sullen keeren  Ende therte v sal faelgeren  Waer blijft dan tgeselschap en daertsche goet  Wat batet al als ick steruen moet.     Alsijt ghij beswaert met fantasien  Al sidi nv bevreest al voor die doot  Wilt ghij voordaen nv vromelijck strijen  Godt sal v helpen wt alder noot:  Aldus leert die werelt haten  Ende wilt die sonden laeten  Die doot cost ons doch vlees en bloet.        Wat.     Adieu prieel vol alder wellusten  Bedriechelijcke werelt een cort solaes,  Ick wil in Godt gaen soecken mijn ruste  Ick moet doch eens worden der wormen aes [p. clxxi]    Wat salt mij profiteren  Houeren ende bancketeren  Als die doot compt snel ende onbehoet, wat batet.     Waer sijnse die pleghen te triumpheren  Sy sijn ghepasseert men sietse nv niet  Wat willen wij dan ghenoechte hanteren  Alst eynde niet en is dan verdriet  Dus laet ons gaen beginnen  Ons seluen te verwinnen  Want de doot compt rasch op den staende voet        Wat     Laet ons nv princelijck leeren steruen  Beschreydende met tranen ons misdaet,  Ende vreesen den Heere wij en sullen niet bederuen  Ende dienen Godt elck in sijnen staet,  Want waer wij ons keeren  Scriftuere sal ons leeren  Dat teghen die doot en is schilt noch boet.        Wat.