[‘O vat vol swaerder sonden’] Een deuoot Liedeken gaet op die wyse: O Radt van auonturen.  O vat vol swaerder sonden  Waer sal ick henen gaen,  Mijn misdaet is quaet om gronden  Dat ick al hebbe misdaen  Veel regaels heb ick gesopen  Mijnen buyc es vol fenijns  Ten tijt is mij ontslopen  Maer ick roep eens om hope  Soete Iesu ontfermt v mijns.     Ick ben een drooghe corste  Een schapken van deuchden bloot [p. clxxij]    Ick slaen al voor myn borste  Met vasten betrouwen groot  Ick bid v lieue heere  Wilt my nv ghenadich syn  Op dat ick nemmermeere  En come in svyants verseere  O Iesu ontfermt v myns.     O Iesu van Nazareene  Myn sonden syn sonder ghetal,  Dies ick met ooghen weene  Ick en weet waer ick varen sal  Ick bid v om ghenade  Om een luttelken termyns  Op dat ic mach myn schade  Verhalen al come ick te spade  O Iesu ontfermt v myns.     Ghy hebt doch willen steruen  Voor ons die bitter doot  En hebt voor ons willen verweruen  Die eewighe blyschap groot  Die Adam hadde verloren  Dies lijde ick veel ghepeys  En roepe noch als te voren  Heer Iesu wilt mij aenhooren  O Iesu ontfermt v myns     Ick bid v met knien ghebooghen  Iesu diet al beschermt  Wilt my doch nemen in dooghe  Als den moordenaer, my ontfermt  Doen ghy daer hebt ghehanghen [p. clxxiij]    Al voor die helsche vileyns  Dies roep ick met verlanghen  Met traenkens ouer mijn wanghen  Heere Iesu ontfermt v mijns.     O menschen allegader  Die in Godts kerstenheyt zijt  Bidt Godt den hemelschen vader  Dat ick doch worde verblijt  Dat hij mij wil beschermen  Al voor dat helsche ghecrijs  Dus wil ick noch eens kermen  En roepen met openen armen  Soete Iesu ontfermt v mijns.