[‘Hoort toe alt tsamen bidt ende waeckt’] Een schoon gheestelijc Liedeken inhoudende die x. geboden Godts, op die wyse alsoot begint.  Hoort toe alt tsamen bidt ende waeckt  Want wij nae Godts beelt sijn ghemaeckt,  Ende v sinnen wilt op heffen  Godts thien gheboden te houden naeckt.  Daer door suldi vreucht beseffen.     Dat eerste ghebot seer excellent  Godts liefde altijt in v herte prent  Met siele met sinnen ende oock met crachte  Maer eenen Godt sij v bekent  Dient hem bij daghe ende oock bij nachte.     Int tweede ghebodt verbiet ons Godt  Ghij en sult niet sweren noch nemen in spot  Den naem Godts in ydelheden  Want die veel sweert die doet als een sot  Ende sijn logijs wert hier beneden.     Dat derde ghebot hoort wel nae mij  Houdt wel den Sabaot van wercken vrij  Ende allen die heylighe daghen  Hoort misse hoort vesper dat seg ick dij  Doet deucht soo moochdi Godt behaghen.     Dat vierde ghebodt maect v wijs  Eert vader ende moeder soo crijchdi prijs  Ende die bouen schreuen sijn verheuen  Eert oock v ouders nae tscrifts bewijs  Soo suldi leuen sonder sneuen.     Dat vijfste ghebodt dat Godt verboot [p. clxxxij]    Met wille, met wercken en slaet niemant doot  En wilt oock niemans doot begheren  Want die hem bringt in sulcke noot  Moet hem met Lucifer gheneren.     Dat seste ghebot ick segghe v bloot  En stelet niet al hebdijs noot  Want tis een groote schande  Een dief verdient te steruen die doot  Ende te hanghen aen die helsche mande     Dat seuenste ghebodt mijn woorden vaet  Verbiet oncuysheyt in elcken staet  Sij doet soo menich mensche sneuen  Luxurie ende ouerspel die sijn soo quaet  Ghebannen wt dat eewich leuen.     Dat achtste ghebot verstaet mij wel  Verbiedt valsche oorconde ende leugen fel  En wilt oock niemanden bedrieghen  Tcomt menich menscht int helsche gequel  Met groote leugenen te liegen.     Dat negenste gebot ons claer verbiet  En begeert v enen mensche huysvrou niet  Ionc wijf, noch knaep in geen maniere  Anders ghij quaemt in groot verdriet  Ghequelt al metten viere.     Dat thiende gebot hoort sijdi vroet  En begeert onrechtelijck niemants goet  Sijt metten uwen wel te vreden  Schout alle giericheyt die dolen doet  Oft ghij comt in die helsche steden     Ghij iongers ende ghij oude lieden [p. clxxxiij]    Wilt op v seluen wel besien  Oft die geboden sijn wel gehouwen  Daer met doet penitentie van dien  Oft ghij moet in die helle schouwen.     Wilt mijns ontfermen ghenadich Godt  Ouertorden heb ick v ghebot  Och heere willet mij vergeuen  Laet mij niet comen int helsche cot  Maer bij v in dat eewich leuen.