[p. clxxxv] Een nieu gheestelyk Liedeken.  Ionck hert laet v trueren  Schipt eenen nieuwen moet  V sal noch troost ghebeuren  V bruydegom is soo goet  Hij wilt noch op v dincken  En beteren al v leet  Sijn bloet sal hij v schincken  En geuen het bruyloft cleedt.     Sij heeft haer hooft op gesteken  Die siele met sonden ghewont  Aen Iesus vloyende beken  Gheleydt haren rooden mont  Wilt mijn herte conforteren  Met uwen rooden wijn  Ic sal mij tot v abandoneren  En dijn vrij eyghen sijn.     Compt in mijn armen rusten  Mijn bruyt mijn duyfken soet  Ick sal boeten al v lusten  Ick bin dat hoochste goet  Mijn waterken can versaden  Altijt versch en altijts nieu  Dus leert die werelt versmaden  En segt der sonden adieu.     Mijn herders raet wil ic volghen  Ic schaepken ruyd en onvroet  Veel regaels heb ick geswolghen  Deur mijnen hooghen moet  Mijnen moet heeft mij doen vallen [p. clxxxvi]    Al inder sonden cuyl.  Dus is mijn hert vol gallen  En mijn bruyloft cleedeken vuyl.