[p. cxci] Een gheestelyck Liedeken.  Hoort ghij mannen hoort, tsij arm oft rijcke,  Den Coninck der glorien, heeft liberael  Hoort ghij mannen hoort, voor een ijeghelijcke,  Een croon op ghehanghen int tshemels sael  Dees croon noyt mensch en sach,  Met strijen men die winnen mach  Alle daech machmen sonder schandt beginnen,  Hoort ghij mannen hoort,  Met vromelijck strijden is dees croon te winnen.     Hoort ghij mannen hoort, dees croon sal euwelijcke  Ist dat ghijse wint, v gegeuen sijn:  Hoort ghij mannen hoort, het hemelrijcke  Waer dat noch verdriet wesen sal, oft eenich pijn  Maeckt v dan op die been  Sijt ghij oft groot oft cleen  Alle daech vernieut, na staet tbeminnen  Hoort ghij. &c.     Hoort ghij mannen hoort, wilt ghij nv weten,  Met wijens dat v nv te strijen staet  Hoort ghij mannen hoort, dees moeten sijn verbeten  Die werelt, het vlees, den vyant quaet  Dees sijn altijt rebel,  Ons Coninck { weet ghij wel }  Om die croon tontfaen dus wilt beghinnen  Hoort ghij mannen. &c.     Hoort ghy mannen hoort die wil aenueerden  Den strijt, hy en derff niet sijn versaecht:  Hoort ghij mannen hoort, als sijn vermeerden  Ruyters, den moet euen vrome draecht    [p. cxcij]    Want den Coninck diet al siet  Sijn hulpe altijt biet  Die die croon om sijnen wil beminnen  Hoort ghij mannen &c.     Hoort ghij mannen hoort, wilt ghij sijn aengeschreuen  V wert tbroot des leuens gegeuen op die hant  Hoort ghij mannen hoort, Ghij moet u ouergeuen  Als crijchslieden plegen, bereyt aen elcken kant  Ghij moet swaer cleeden doen wt,  Een harnas nemen dat sluyt  Met den wille, te minsten beginnen        Hoort. &c     Hoort ghij mannen hoort, schijnt dit te swaer te wesen  Denckt in wiens dienst dat wert ontfaen  Hoort ghij mannen hoort, sijn bloet ghepresen  Heeft hij voor v gestort, die doot aenghegaen  Het is ons Godt ons heer,  Allen goet ist, wildy meer.  Wilt die croon { tis v profijt } beminnen.       Hoort. &c     Hoort ghij mannen hoort, soeckt ghij practijcken  Hoe dat ghij dees vyanden, sult aengaen:  Hoort ghij mannen hoort, met meest te wijcken,  Met vierighe pijlen, sult ghij best bestaen  Want wie vliet, haer ontgaet:  Die Godt bidt tot sijnder baet,  Seynt sijn Engels die ons saec beminnen        Hoort. &c     Hoort ghij mannen hoort, dunckt v dit niet te wesen  Kenmerckt eens wat dat Elizeo is gheschiet:  Hoort ghij mannen hoort, van Israhel wilt lesen  Thobiam Mariam en Ioseph aensiet [p. cxciij]    Want som sijnde gheuliet  Ontgaen sijn al tverdriet  Door die Engels wilt dan stout beginnen.        Hoort. &c     Hoort ghij mannen hoort, vint ghij nv tijtelijcke  In strijden verdriet, v oogen eens opslaet:  Hoort ghij mannen hoort, het eewich rijcke  Hoe dat in den hemel die croon blinckende staet  Siet hoe ghij moocht sijn gheeert,  Salich wie dus strijden leert  Niemant en can dees croon genoech beminnen        Hoort.     Hoort Princen hoort, nv die croon is opgehangen,  Te velde doch coompt, eer v verrast die doot,  Hoort Princerssen hoort, wilt oock met ganghen,  Want uwen loon sal wesen euen groot,  Wie ghij sijt neempt eenen moet  Hout voor v deewich goet  Sijt ghij groot oft cleyn wilt terstont beginnen:  Hoort ghij mannen hoort  Met vromelijck strijden is dees croon te winnen.     Amen.