Een gheestelijck Liedeken.  O Heere o Godt, o goetheyt altijt,  Hoe bemint ghij nv alle lieden  Ghij geeft het licht, die het lichte benijt,  Ghij doet keeren die van v vlieden:  O vader mijn, wie sal v goetheyt wt spreken?  Wilt ons hert doch eens ontsteken,  Ons ondanckbaerheyt wilt niet gedachtich sijn. [p. cxcvi]    O heer midts liefde alleen tonser baet  Wt den hemel quaemt ghij ghetreden:  V vyanden getoont v fiere gelaet,  Door v bloet in bracht die vreden  O vader mijn. &c.     Uoor allen wonder hoe dat sij oock sijn,  Ons sondaren hebt ghij ghegeuen  Eenen geestelijcken medecijn,  Die mach houden ons siel int leuen  O vader mijn. &c.     Om sterck te sijn in allen strijt,  Hebt ghij oock ons heer versien,  V edel lichaeme tot een spijs altijt,  Ons ghelaten, wie salt bedien  O vader mijn. &c.     Die v affgaet en weder keert,  Doet ghij heer weer den hemel open:  V gratie ghij in haer vermeert  Ghij hulpt voor al die in v hopen  O vader mijn. &c.     Die gewillich sijn, in allen noot,  Staet ghij bij, en maeckt cleyn haer smerte:  Ghij vertroost haer, al sijn haer sonden groot,  V goetheyt ist { o heer } der herten  O vader mijn. &c.     Die sij seluen breckt, sij seluen wtgaet,  Hoe wert hij dick verlicht van sinnen:  V straelkens ghij dich in sijn herte laet,  Dick midts liefde brant hy van binnen  O vader mijn. &c.    [p. cxcvij]    Die in v alleen soeken wellust,  Wat iolijt, watten vreucht sij vinden,  Haer verstant, haer tonge sijn dicmaels in rust,  Vier en vlam sietmen haer verslijnden  O vader mijn. &c.     Die volherdich sijn in haren teghenspoet  Staet ghij by en bereyt haer croone  Hoe minlijck verandert ghij tsuer int soet,  En sedt haer in des hemels troone  O vader mijn. &c.     U leuende fonteyn ghij haer gont  V seluen int tshemels wijcken  Allen goet, en dat met eewich verbont  Segt dan princen met mij ghelijcken  O vader mijn. &c.