Hoe des hertoghen van lymborchs ridders margrieten alom gesocht hadden ende niet en vonden. ende quamen weder te hove.

Dat. XIIIJ. capittel.

EVERAERT seide. gesellen ons soeken is al moyte verloren. wij hebben ses maenden wt geweest ende wi en vernemen nieuwers van margrieten der schoonder maecht wat nu te rade: want waer wi gaen/ rijden/ oft keeren/ tis al om niet. ic waende wel dat wi souden verworven hebben die. vc. merc silvers dier die hertoghe op ghestelt heeft. mer neen wi. Doe seide everaert. ic rade dat wi reysen biden hertoge weder om thuys. ende laten hem weten hoe wi ghevaren hebben. Dus waren dese. ij. heren te rade ende reden weder om na dlant van limborch daer si haest ghereden in quamen. Comende voor die stadt van lymborch so quam hem die hertoghe teghen om te weten hoe dat si gevaren hadden. Everaert ende hercoenraet quamen biden hertoge. ende deden hem reverencie soot sijnre edelheit wel toe behoerde. Die hertoghe die vraechde mijn heren hoe ist. hebdi yet vernomen van margrieten mijn dochter. hebdy verdient die. vc. merc silvers. Si seiden beide. o edel hertoghe otte van lymborch dat

wilden wi wel. so waren wi verblijt daer wi nu droeve sijn. Hoe seide die hertoghe hebdy dan van haer niet vernomen ende ghi so langhe wt geweest hebt dat geeft mi vreemde. want men soude in vi. maenden doer rijden al kerstenrijck. Doe seiden si weder wi kennen here dat dat al waer is. ghi sult horen die landen ende steden die wi doer reyst hebben. ierst in brabant/ hollant/ en zeelant/ vrieslant ende in west valen/ cleeflant/ ende geldre ende het lant van guylke/ ende van den berge. het sticht van colen/ beyeren ende sassen/ brandenborch/ ende swaverlant mede. het lant van oostenrijc al doer. ende ytalien. ende in lombardijen den veneetschen kant. ende rome/ in calaberen/ in polen/ in napels. die stadt dlant van geneven. ende al melanen doer. in switserlant ende in vrancrijc. in avernen ende ooc in spaengien. in betaengien. ende in enghelant comende also doer vlaenderen. in henegouwe en hebben wi van haer ghehoort noch konnen vernemen. Hadde si in eenich van dien lande geweest wi hebben al sulcken naersticheyt gedaen wi haddender wel af verhoort mer lacen neense. Als die hertoghe dit hoorde ende heyndric van lymborch sijn sone. doe antwoerde heyndric ende seyde. o vader here tis verloren gesocht die dieren hebben se verbeten inder bosschage. twaer anders onmogelic. na dat die heren al dese landen doersocht hebben. si soudender af vernomen hebben. in deen lant oft indander. Doe seyde die hertoghe heyndric ghi segt al waer. die dieren hebbense doot. dat gode geclaecht si. ghi heren ic danc u dat ghise gesocht hebt. ic salt u lonen dat ghijs my bedancken sult. gae wi bancken teeren. Die voorghenoemde her everaert ende coenraet wistens hem danck. ende si volchden den hertoghe ter salen so hi belast hadde.