Hoe die heeren die ghemeente ontboden. ende seyden hem lieden des hertoghen aen sprake. ende wat si daer op antwoorden ende presenteerden.

Dat. LIIJ. capittel. [ 22 ]

DOEN si in die stadt gecomen waren die domproost ende die governuer. ende si den bisscop ian ghesproken hadden. so ontboden si die ghemeente dat si horen souden die aensprake van den hertoghe van lymborch. Doen die ghemeente gecomen was. so hoorden si die woorden vanden hertoge. Daer op si antwoorden ende seiden. wi kennen dat wi der daet sculdich sijn. ende in beteringhe van desen. so sullen wi wtelcker nacien maken dat hi hebben sal. x. duysent cronen. ende elc sal gheven nae sijn macht ende nae sinen staet. ende si waren al tsamen te vreden datment also dede Aldus reysden si weder int heyr bi den hertoge ende gaven hem te kennen den last der gemeenten als die hertoge hoorde die presentacie die si boden, als vanden. x. duysent cronen doen seyde hi. her arnout van ardennen

wat segt ghijer nu af. Arnout seyde. heere neemt die. x. duysent cronen. ende ooc mede die presentacie vanden bisscop tsal u profiteliker sijn dan lange te orloghen. Die hertoge dochte dattet waer was. ende hi seide totten ambassaten gaet in u stadt. ende doet also ghi geseyt hebt ende maect u presentacie bereet. ic sal u lieden besegelen eenen vasten pays. Die heeren namen blijdeliken orlof. ende si droeghen die tijdinghe in die stadt. daer grote blijschap was. om dat si pays hebben souden. Ende Arnout hadde vanden hertoghe door sijn getrouwicheit. v. duysent cronen. daer hy op leyde sinen staet ende bleef bi den hertoghe van lymborch. Ende aldus was den pays ghetracteert ende gesloten tot des hertoghen wille. ende die presentacie van den bisschop ghegheven. Ende also laet ic dat bliven. ende wil scriven van heyndric van lymborch ende van europa die hertoginne van melanen.