Hoe evac ontsteken wert in liefden op die coninghinne sybilla. Ende hoe si die honden bevochten. daer etsijtes ghevanghen wert vanden heren van persen.

Dat. LXXVI. capittel.

ALS die wechter den dach geblasen hadde. ende die claerheyt aen quam. so wert evack wacker. ende hi stont op ende ghinc wandelen in den roosegaert. daer hi teghen hem selven wert claghende. dat hem leedt was dat hy noyt in arragoen quam. ende dat om der coninghiinne wille die hem ontsteken hadde met haerder minnen. dat nochtans dwaesheyt was van hem. dat hi liefde droech op een gehoude vrouwe Mer dat is omme niet. als die liefde comt soo comt sie onversiens. ende si en siet aen hoocheit edelheit noch wijsheyt noch staet van eeren. mer volcht recht der natueren verkiesinghe. Met dat evac aldus stont en fantezeerde. so hoorde hi dat

trompet slaen. ende doe dachte hi wel datmer vechten soude. hy ginc hem wapenen ende stelde hem te paerde om dierste te sijn in die bataelge. Etsijtes ende die coninc ende sijn ander heeren stonden al in die ordene. om te bevechten die sarasinen. ende si namen orlof aen sybilla der coninghinne. ende si reden ter poorten wt teghens die vianden. Die coninc alant van barberijen stelde sijn bataelghe om te weder staen die kerstenen. Inden iersten yvorijn van monbrant die hadde die vaengaerde met vijftich duysent sarasinen. daer na ferant van persen. XXX. duysent. ende daer nae corborant ooc. XX. duysent. ende die coninc alant van barberijen met. I. duysent hielt die riergaerde. Daer sloegen die basunen ende trompetten vanden kerstenen datmen nauwelijc en hoorde. Ende die heydenen bliesen alle haer horens. Doen quam evac aen gheslaghen met sinen volcke op yvorijn van monbrant. also dat hy met sijnder machte die turcken dede wijcken. Die coninc van arragoen terus ende etsijtes sloegen op ferant van persen ende op corborant van tateren. Daer was drie uren lanc seer gevochten. dat si vele honden doden. ende etsijtes bleef al even gierich op die honden slaende. Corborant die sach dat hi so vroom was ende also vele heyden doode. so sloech hy met sinen volcke op etsijtes. dat si hem verlasten ende vinghen ende der heyden macht wert also groot dat die kersten wijcken mosten nae die stadt toe. Daer was aen beyde siden veel volcx verslaghen. mer die kersten vergaderden hem selven in die stadt. Ende die heyden trocken weder in haer perc daer si beclaechden die schade ende dat verlies van haren volcke. Corborant seide die vrouwe is qualic wert datter so vele edel payienen om sterven. mer niet te min al heb ic schade. mijnen prijsonier mijn ghevanghen man die salt al versoenen. Daer ghingen si ordineren wat dooden dat si hem aen doen souden in spijte vanden kersten ghelove. deen woude villen. dander raybraken. die derde. quartieren die vierde sieden. ende twaer onsegghelic die pijne die si hem aen doen wouden. Etsijtes was seer bedruct alst reden was ende hi seyde. adieu vader ende moedere. ende boven al die over schoone margrieta van lymborch die ick nemmermeer sien en sal. adieu mijn wtvercoren vrienden alle gader. adieu ay lacen ick sie die doot voor mijn oghen. want dese vermalendide honden en weten niet wat doden dat si mi willen aen doen. mer niet te min ic sal sterven voort kersten gelove O evack lieve neve wist ghi mi in deser noot. ghi soudt my vertroosten also verre alst in uwer machten waer. Evac ende die coninc over saghen haer volck. mer si en vonden etsijtes niet. dies si alle te samen seer bedruct waren. ende si en wisten niet weder hi doot ofte levende was. Doen wasser een ridder die seyde. ghy heeren te samen ende heer coninc te voren. ick segghe u ende ic laet u weten dat hi niet doot en is. mer hy is gevanghen van corborant van tateren ende in sijn tente gevoert. want ic wasser bi. ende ic saecht. Als dat evac hoorde so was hy verblijt om dies wille dat hy niet doot en was. aldus so ghinc hi ordineeren metten heeren hoe datment maken soude dat men hem verlossen mochte. Die coninc van arragoen en wiste gheenen raet noch die ander heren. Doen seyde die ridder evack ghy sult mi doen eenen hoop volcx te voet ende te paerde. ick wil te nacht int heyr ende verlossen mijnen neve etsijtes. oft selven daer voor sterven. want die dieven sijn so wreet. bleef hijer tot morghen hi soude ghedoot worden. Doen seide die coninc twaer grote dwaesheit dat ghi bestaen wilt so aventuerlic te trecken metter nachte om te slaen op die heydensche honden. Doen seide evac daer en leyt niet aen. mer op den troost van god almachtich sal ict bestaen. ende ter eeren van allen schonen vrouwen ende mijnen lieven neve etsijtes. Doen dede die coninc aldat hi begheerde ende dede hem also veel volcx te voet ende te paerde alst hem beliefde. ende nootliken was om mede te vechten.