Hoe de Grave al ghestoort nae de Haven reet daer hy 'tSchepe ginck.
Capittel XI.

De Grave reysde seer verstoort uyt Parijs nae de Haven rijdende, daer hy terstondt inde Galeye1 is gegaen ende also haest als hy 'tschepe was, werden de zeylen op ghetrocken, ende de Anckers in ghehaelt, maer hy en sagh niemant, noch niemant en sagh hem.

Als de Galeye neven der Keyserinnen Kasteel gekomen was, leyde hy sijn Paert voor de poorte, dat hy daer ghetoomt liet staen, ende ginck op 't Palleys in de sale ghelijck hy ghewoone was: Zoo haest als hy inde zale quam, sach hy de tafel al ghereet staen daer hy te sitten plach. Doen ginck hy inden zetel neven de Tafel sitten, daer hem terstondt handtwater ghegheven, ende van alderhande spijse, dranck ende fruyt seer eerlijcken ghedient werdt. Terstont als hy ghegheten hadde, wert hem handtwater ghegheven, de tafel afgherecht2, de toortsen bestonden voren te

gaen, die hy nae volchde tot inder Keyserinnen kamer: doen hy nu te bedde was, gingen de toortsen uyter kamer.

Doen quam de Keyserinne sonder eenich licht neven hem te bedde, die hy met blyschappen in sijn armen ontfinck, haer vertellende alle de maniere van oorlogen, hoe hy heel Vranckrijck vanden vyanden verlost hadde: des de Keyserinne onsen Heere danckte van dat hy hem so schoonen victorie verleent hadde. In deser manieren was de Keyserinne met den Grave wel twee maenden, meenighe ghenoechten ende blischap bedrijvende.