Refereyn.
- Ghent, ghy waert een stadt vul vreden,
- Ghendt, ghy zijt nu vul van pynen.
- Ghendt, ghy waert vul mogentheden,
- Ghendt, nu ziet men u verdwynen.
- Ghendt, voor lachen moet ghy nu grynen,
- Ghendt, alle vremde besaghen u.
- Ghendt, dat 's uut, alzoo 't magh schynen,
- Ghendt, u zonden plaghen u.
-
- Ghendt, vul eeren, Ghendt, vul vrueghden,
- Ghendt, vul rijckheden onverholen;
- Ghendt, vul weelden, Ghendt vul dueghden,
- Ghendt, vul consten t'allen scholen.
- Ghendt, vul blyscepen zonder dolen,
- Ghendt, 't magh nu meshaghen u,
- Ghendt, u wijsheit es al ghestolen,
- Ghendt, u zonden plaghen u.
-
[p. 136]
-
- Ghendt, ghy sullet eewich vermanen,
- Ghendt, ic en zie dijns gheen ghenesen,
- Ghendt, ghy hebt nu een zee vul tranen,
- Ghendt, u hulper moet wijsheit wesen.
- Ghendt, ic duchte dat byna es gheresen
- U sententie, want u wercken bedraghen u;
- Ghendt, ghy brynght u zelven tot desen,
- Ghendt, u zonden plaghen u.
-
- Prince.
- Ghendt, wilt u rasch beteren,
- Ghendt, haudt up in tijts eer 't wert te late,
- Ghendt, anders werdy onder voeten sleteren,
- Ghendt, neempt goeden raet te bate,
- Ghendt, dat sal u commen te state,
- Ghendt, ander landen beclaghen u,
- Ghendt, haudt toch in als mate,
- Ghendt, u zonden plaghen u.
-
- 1580.
- C.A.
|
