[p. 145] Refereyn.  O heere van Ryhove, waer blijft ghy zoo langhe,  Metten Ghendschen standaert, niet om verrijcken?  Haest u met de Ghendsche knechten, stelt u te ganghe,  Want Mansfelt haut Doornicke in bedwanghe.  Zijn knechten en sag men voor Mortaigne niet wijcken;  Met Sent Amants en Antoigne zijn sy oock gaen strijcken.  De Franchoysen beyden naer u, o ghy Colonel verheven!  Om in Doornicke te gheraken ligghen zy en kijcken;  Marcheert rasch up, en wilt suchten noch beven,  U knechten wilt altijts goeden moet gheven;  Maer en laet Assche niet achter, den goeden helt,  Want hy vooren ryden moet, en roepen sonder sneven:  ‘Ontdecket velt, carebynen, ontdecket velt!’     Ghy, heere Van Mortaigne, en wilt niet slapen,  Stelt u volck bereet in de wapen ten stryde;  Zouct met alle middelen den vyandt te betrapen;  Om te suypen en seecken en mueghdy niet scrapen;  Lecker eten, droncke dryncken es nu buyten tyde.  Ghy soldaten, hoort wat ick u belyde:  De Walen en sijn gheen santen, goet om verwinnen,  Maer cloucke soldaten, in 't breet, in 't wyde.  Om huerliêr partyschap te tooghen wilt u versinnen; [p. 146]    't Es al ghestolen en gherooft buyten en binnen.  Volght staut mijn heere Van Assche onghequelt,  Want hy sendt zijn volck vooren, segghende uut minnen:  ‘Ontdecket velt, carebynen, ontdecket velt!’     Waer blijft ghy, Lanou, colonnel vaillant,  Es uwen vlaemschen quant noch niet ontladen?  Compt, Prince van Conde, naer ons vaderlant;  In stede van beschermen, compt, werpt uut u hant:  Balfort sal u wel helpen sonder beraden.  Ons ghebreect noch volck, die niet en sijn om versaden  Van heurliêr bursse te laden met d'onnoosel goet;  Heescht vry ducaetkens fel, veel ghelts versmaden,  Ende en doet de Walen gheenen grooten teghenspoet.  Wat zijt ghy gheholpen met 't sturten van 't bloet!  Volght Mijnheere Van Assche, het dient u vertelt,  Hy belast zijn volck en seght met goeden moet:  ‘Ontdecket velt, carebynen, ontdecket velt!’     Prince. Marneau en Tryllo wilt met u ruyteren marcheren;  Want het velt es ontdect en den vyandt es ghewesen;  Hembyze en Burcht sullen ulieder assisteren.  De ghewillighe van Ghendt en sullen oock niet cesseren,  Die met haer witte boordekens den vyandt verknesen  Voor Meenen, metten hertooghe Casimirus, hooghe ghepresen;  Maer 't was al wech te loopen, wilt my verstaen;  Want doen sy te Wevelghem waren gheresen  Zonden zy Marten in den Leeu te Corterijcke om spaen, [p. 147]    Om haerlieden te doen bedelven saen,  En deden heur de poorten open hauden met ghewelt.  Rijt vromelick an, Mijnheere Van Assche sal vooren gaen:  ‘Ontdecket velt, carebynen, ontdecket velt!’          Courtray.