[p. 177] Refereyn.  O zeventhien landauwen, hoe zidy verzeert;  In een orghel verkeert tot onsen onbaten!  Zoo aen een orghel dryderande pypen worden gheëert,  Als hooghe, middelbare gheleert, en cleene vaten;  's Ghelijcx bevinde ic te wesen onder die rebelle staten  Drye soorten van laten, in 't openbare,  Te weten: den Prince, met zommighe prelaten,  Corresponderende ter saten met de groote eenpare.  De edelmannen en cooplieden met de middelschare;  't Ghemeen peupel clare, boven al in ghetale,  Met de minste, om Christus bruyt te maken zware,  Accorderende met quâ mare in 't generale.  Dry blaesbalcken de orghel toeghevought zijn loyale  Als Aldegonde, Terin, Vileers, wilt dit onthauwen, man.  Den wint van eyghen bate, stekende in haerliêr male;  Een gheveynst herte menighe benauwen can.     Van dese dry blaesbalcken, zoo ic can anmercken,  De duyvel tot verstercken van de instrumenten  Blaeser es; dblijct an de registers wercken;  Die sententien, die zy uut snercken, als bedroufde committenten, [p. 178]    Dwelck die .xvij. landen zijn, wilt dit inprenten,  Waeraf zommighe genten stom zijn, ende niet en spelen,  Als Luxenburgh en Artois, die 's conyncx regimenten,  Oock Namen, Mechelen en Rijssele niet en vervelen;  Zommighe discoort met rooven en stelen,  Als Brabant, Vlaenderen met Ghelderlant fijn,  Henegauwe en Vrieslant, die moorden en kelen.  Rebelle Hollant, Zeelant, die de goê doen abondant pijn,  Oick 't sticht van Utrecht en Doornicke, met een constant schijn;  Dlant van Overijssel en Groenynghen moest flauwen dan,  Als 't den conynck verliet, en wilde aen Oraingens verbant zijn;  Een gheveynst herte menighe benauwen can.     Noch zijn an dit werck .xviij. clauwieren,  Om des orgels vercieren, van zommighe verheven,  Dwelck zijn de .xviij. Mannen, om twist te allegieren,  Van Ghendt en Brussel, die dlant brynghen in sneven;  Want den Prince als organist, veel boosheit heeft bedreven.  Op hemliên spelende wel zijn loose zeden.  De pypen gheopent van de clauwieren beneven,  Vatende den wint van de blaesbalcken vul onvreden,  Deur des blasers ingheven, die de waerheit wilt vertreden,  Spelen sulck spel als den organist es begheerende;  Om welcke muzyke de pypen langhe hebben ghebeden,  Die ghenaempt es Ghewelt, die liefde weerende,  Rooverie en Moort, d'onnoosele scheerende;  Politie en Justitie ligghen nu verdauwen van  Den organist, die hem met woorden niet es gheneerende;  Een gheveynst herte menighe benauwen can.    [p. 179]    Dat desen organist vul boosheits bevonden  Speelt t'allen stonden, met valsche treken,  Es blijckelick in 't accepteren, elcken t'oirconden,  Van het gouvernement van Brabant, zonder spreken;  Ja, oock niet presenterende, by daghen oft weken,  Om het lieutenantschap generael eenighe requeste  An Don Matthias; nochtans es hy daer in ghesteken  Van dese clauwieren met ghewelt in 't leste.  Dan heeft dese orghel tot verciersel voor 't beste  Bovenstaende een Inghelken, dat hem met blasen schijnt schueren,  Daer 't nochtans niet en doet contrarie de reste.  's Ghelijcx es Don Matthias, maer notaris in 't labeuren;  Want van den organist gheordonneert es te veuren  Zijn spel, dat hy zal spelen, om 's lants berauwen, an  Kercken en cloosters onteeren, jonck en audt doen treuren;  Een gheveynst herte menighe benauwen can.          Prince.  Ter wat schole desen organist dit spel vercreghen heeft,  Blijckelic zijn leven gheeft, men maght begruten,  Een beestelick leven hy hem selven bedeghen weeft;  Exempel an de hyenen en boose crocuten.  Deze twee contrefaicten der menschen uten  Fauxsamblantich, brynghende in 's doots verstyven;  Alleleens ghelijc de crocodillen hem ontsluten,  Zoo vermoort hy de lieden als zy sauden te lyve blyven;  Ja, boven dien quâ troglodyten doende vrueght verdryven,  Ergher dan die Seyten es u spel vul onghenaden, [p. 180]    Levende by den vleessche van mannen en wyven;  De Cathaplepen gaedy te boven in u daden,  Die 't volck doot zien; zoo doedy met u raden;  Waer deur menich ziet, met beschrauwen, an  Ons zeventhien landen ghestelt tot schaden;  Een gheveynst herte menighe benauwen can.          1580.       L.H.M.