[p. 224] Refereyn.  Haudt u ghezichte, edel hooftstat van Ghent,  Want wordt ghy blent, ghy sult zoo deerlick ghebrilt zijn;  De brilmakers zijn op u gheheel Malcontent,  Om dat, door u schoon ghesichte excellent,  Haer brillen van uliên gheenssins ghewilt zijn.  Zy segghen: ‘Den toorne en zal niet eer ghestilt zijn  Voor dat u den bril vast op den neuse staet,  Daer ghy totten beene sult mede ghevilt zijn.’  Hier toe so soecken zy allen listighen raet,  Het wert voor u een ongheneselick quaet;  Dies wilt ghy weten wie u den bril sal opstellen,  Wanneer u God met straffe, als nu, tot blentheit slaet?  Den Spaenschen brilmaker met zijn werckghesellen.     Neemt een exempel aen diversche steden,  Wat leet zy leden, metten bril op den neuse.  Hierom dienter vierich voor ulieden ghebeden  Dat ghy mueght verlicht zijn met een claer ghesichte vol vrê,  Als een reyne bruydt, verchiert met haren bleuse,  Op dat ghy niet en vaert ghelijck den Reuse,  Welck van den brilgasten noch ghevoelt 't verdriet.  Wilt ghy dan blyven als de victorieuse  Laet u gheenen opstellen hoe qualick dat ghy siet; [p. 225]    Maer wilt ghy weten als u 't ghesichte ontvliet,  Ende u gheen oogwater can helpen noch pellen,  Wie ulieden den bril sal opsetten met vliet?  Den spaenschen brilmaker met zijn werckghesellen.     Ghy weet dat hy alle neersticheyt doet,  Met lijf en goet, om zijn brillen te venten;  't En is hem niet noodich, als een aerm bloet,  (Die van alle rijcken en schatten heeft overvloet),  Dat hy zijn domainen sal vercoopen, juweelen of renten;  Want hy over alle landen heeft wel sulcke mandamenten  Dat elc zijn brillen dier sal moeten coopen of halen.  Wee u, dan, ghy hoofstadt, als hy zijn brillen sal vercoopen en prenten  In u naeste dorpen, steden, ende ontrent u palen;  Eyst dat u dan eenighe brillen falen,  't En is gheenen noodt hem daerom zeer te quellen.  Vraeght ghy wie 't doen sal, en hem wel doen betalen?  Den spaenschen brilmaker met zijn werckghesellen.     Princelicke princieren, op u zelven neempt acht,  Vliet den duysteren nacht, wandelt in den lichte;  Verzwijmt de gave niet der godlicker cracht,  Al zijt ghy uut het licht in de duysternisse ghebracht.  Bidt Godt, hy sal u wedergheven het clare ghesichte;  Want laet ghy den brilman in u sterck ghestichte,  Door u blentheit commen onghemolesteert,  Hy sal u den bril, zeer swaer van ghewichte,  Op den neuse setten, hoe ghijt refuseert. [p. 226]    Als men dan vraghen sal: ‘Wie heeft u dus ghepareert?’  Met weenen en claghen sult ghy dan vertellen,  Als een maeght vercracht, gheschent, ghevioleert:  Den spaenschen brilmaker met zijn werckghesellen.          Ghedruct als 't voorgaende.