Refereyn.  Ghy inwoonders van Ghent, laet varen u vermeten,  Dwelck ghy Rhetorijckelick elcker doet weten;  't Schijnt dat ulieder nemmermeer yet sal ghebreken;  Maer dynct dat niemandt noyt zoo hooghe was gheseten,  Hy conde wel dalen, 't is wel ghebleken.  Was den drager des lichts niet uten hemel ghesteken,  Door zijn verblentheit in d'ooverdie bevonden?  Als Godt de zonden van den menschen wilt wreken  Zoo laet hy se vallen, naer tschrifts oirconden. [p. 229]    Ziet dan neerstich toe op dat ghy niet en wert verslonden;  Want mits dat ghylieden verblent zijt deur boosheyts ontketten;  Daerom zal fortse, wille, cracht, met subtyle vonden,  Ulieden, ghy inwoonders van Ghendt, den bril opsetten.     Om dat ghyliêr door rebellicheit nu zijt verblent,  En door heresie, dat fenynich serpent,  Zoo men aen u medebroeders wel siet ghebeuren;  Om dat gaut en selvere van u wert bekent,  En gheacht boven de liefde, zo naken u doleuren.  De verblentheit braght ulieden eens al by in treuren;  Maer God en wildet noch niet ghehinghen,  Dies hoe sterck dat ghy zijt van poorten en mueren,  U rebellicheit sal u noch al te neder bringhen.  Keert dan in tijts tot God, eer dat men u comme bespringhen,  Want mits dat ghylieden verblent zijt, wilt hier op letten;  Daerom zal fortse, wille, cracht, die 't al can dwinghen,  Ulieden, ghy inwoonders van Ghent, den bril opzetten.     De mueren van Jericho sijn se niet, deur Gods bevel,  Te neder ghevallen? Verstaetet toch wel.  Waer deur moesten die van Troyen haer stat verlaten?  Darf hem yemant op zijn stercte betrauwen fel?  Ic zegghe u vry: ‘Neent!’ 't Verstant wilt vaten.  Dus, ghy inwoonders van Ghent, neemt dit t'uwer baten,  Ziet dat de verblentheit ulieder niet en verwint;  Want alle de ghene, die ulieder haten,  Soecken allen raedt en subtylheit (dit wel versint), [p. 230]    Op dat ghy moght bevonden werden tweedrachtich gheint;  Want mits dat ghylieden verblent zijt in zulcke bruwetten;  Daerom sal fortse, wille, cracht, die 't al verslint,  Ulieden, ghy inwoonders van Ghendt, den bril opzetten.     O ghy, princelicke borghers, die u stadt hebt besworen,  Wilt in tijts tot God keeren en u Conync vercoren;  Want u vyanden groot zijn en niet en slapen.  Maect paeys met hemlieden, wilt liefde orboren;  Want de wolven in schaeps-cleeren soucken u te betrapen.  Neempt die rechte aude leeraers en gheen duvels cnapen;  Elc zijn leven presentere voor den Conync ter doot.  Gurt aen u rijsweerden en doet an u wapen;  Verjaecht die valsche leeraers, die u bringhen in noot,  Oft anders uliên naect grooten wederstoot;  Want mits dat ghy verblent zijt, dwelc my doet smertten,  Zal fortse, wille, cracht, beê cleen en groot,  Ulieden, ghy inwoonders van Ghendt, den bril opsetten.          1580.       Ghedruct als 't voorgaende.