[p. 33]
- IX - [Ghy, edel geesten, die in vruecht hanteren]aant.
Ghy, edel geesten, die in vruecht hanteren,
diemen metter conste siet seer verblyen,
& eendrachtelyc siet veriubileren,
& druck laet cesseren // wiet mach benyen,
ontweckt die beswaert syn met fantasyen,
met consten vruechdelyc hem ontspringen,
duer der rethorycken constich belyen,
& met partyen // wilt liefflyc singen;
al comter dickmaels discorde in dringen,
duert inmingen // der nyders eenpaer,
sueckende duer afgonst die sy voort bringen
met nydich inwringen des hertsen swaer,
om te crinckene u constich voorstel claer;
maer op hen bedryven acht niet twee boonen:
die sulcx is sal synen aert thoonen.
[p. 34]
Alsulcx vintermen, in veel plecken,
die, int bemercken des constich oorboren,
duer villonye metter conste gecken,
hem selven verwecken // wt grooten toren,
en willen de vruecht der conste versmooren;
het welck wel blyckt, naer hen bewysen.
Maer, lieffhebbers der consten gesworen,
laet niet verloren // den moet u ontrysen;
wilt getrouwe lieffde de conste bewysen;
soo machmen u prysen // tot allen uren.
Al sietmen sulcke somtyts veriolysen,
duert spysen haerder nydiger labueren,
seer cleyn achtende de const als lueren,
laet ghy u benieren //, ghy sult u hoonen:
die sulcx is sal synen aert thoonen.
Men vintter noch die de conste verdrucken,
& dats, midts datse haer is onbekent;
want sy gheen vruecht daer wt en plucken.
Maer sulcken stucken // syn ommers seer blent.
Wat schaedt de sulcke dat de conste jent
vruechdelyck gebruyckt wort, niet om verchieren?
Maer ghy, die de conste seer excellent
[p. 35]
int herte prent //, wilt triomphelyc vieren;
steckt vryelyc wt der consten banieren;
duer haer verchieren // wilt genuchte vaten,
al moet ghy hooren veel schimpers craieren;
tconstich bestieren // en wilt niet verlaten;
want al stoorde ghy u seer boven maten,
ten sou u niet baten // tot uwen verschoonen:
die sulcx is sal synen aert thoonen.
prinche.
Prinche jent, weerdich alder eeren,
diemen in consten seer lustich siet bloeyen,
wilt doch den ongeleerden liefflyc leeren
die tot u keeren // om tconstich bevroeyen;
op dat sy als rancxkens me mogen groeyen
vander rethorycken seer triomphant.
Soo mogen sy vilonye verfoeyen
en vierich gloeyen // in conste geplant,
versaemt metter musycken valyant
die aen elcken cant // therte doet verlichten.
Al vintermen vele, over al int lant,
[p. 36]
die de conste playsant // duer nyt bevichten,
tot verstooringhe der vruechden gerichten,
met schimpige dichten // haer broeder loonen:
die sulcx is sal synen aert thoonen.
