[p. 63]
- XV -
Devisen van elck een van den ommeganc, halff Oost ao 1563.aant.
Waert dat elck hem selven niet en sochte
versmayende giericheyt & eygen baet,
& niet anders en deede dan hy en vermochte,
redenen gebruyckende duer wysen raet,
soe hadde elck rust & vrede in synen staet.
Elck treckt om dlancxsten om, tot cleyn profyt;
want hy quelt hem selven & verliest synen tyt.
Soo lange als den hoeywagen is geladen,
en sal elck met trecken hem niet versaden.
Out bedroch elck met de blau huycke soo verblint,
soo dat hy hem selven soeckt & niet en vint.
[p. 64]
Elck soeckt hem selven & comt int verdriet,
om dat hy hem selven niet wel en besiet.
De cappelle soude wel weder opcomen metter tyt,
maer elck soeckt te seer syn eygen profyt.
Elck heeft een keyken dat hem somtyts quelt,
& hy en wils niet weten, dan alst hem selven melt.
Elck hadde geerne geluck met rycdom bepeyrelt;
maer tis al niet de idelheyt der weirelt.
De prosen.
No 1.
Dees jonge dochters beclagent haer seere:
elck wilt eenen man hebben, tdunckt haer eere.
No 2.
Dees jonge weuwen, hoe wel sy bedeckt rou dragen,
quaem haer paertuere, sy lieten haer schou vagen.
No 3.
Een oude quene, die nau gaen en can,
die sou wel begeiren eenen jongen man.
[p. 65]
No 4.
Een out rocheler, van leden styff,
die wilt hem noch verfrayen met een jonck wyff.
No 5.
Memmen, vrouwaersters & vroevrouwen,
dees prysen al kinderen maken & bruyloft houwen.
No 6.
Dry vrouwaersters, dry vroevrouwen & dry waschersen
maken tsamen negen vande coppelersen.
No 7.
Maer al mocht ons maerte winnen seven croonen,
sy en wilt niet meer dienen daer kinderen woonen.
No 8.
Ons kindermaerte, salt haer oock hinderen,
speelt liever met de knechts dan met de kinderen.
No 9.
Eenen coppelare, die syn ambacht wel can,
weet de vroukens te vueren aenden man.
No 10.
Creimers, speellieden & lichte verten
begeiren altyt kermisse oft jaermerten.
[p. 66]
No 11.
Makelaers, stuytvossen & muylstooters, te recht,
wouden wel dat tvolck bleeff al even slecht.
No 12.
Backers & brouwers, tappers & vleeshouwers,
prysen al gesonde dranck & spysverdouwers.
No 13.
Maer cellebroeders, apotekers & medesynen,
wenschen om veel siecken tallen termynen.
No 14.
Arbeyders die niet en staen op gesette uren,
prysen corte dagen & groote dachhuren.
No 15.
Den rentier wilt nu op dmeeste profyt letten;
daerom wilt hy syn gelt op interest setten.
No 16.
Gierige woeckerers, dwelck elck verwondert,
en schamen haer niet te nemen veertich ten hondert.
No 17.
Vercoopers van lyftochten, elck in synen staet,
bederven goey polosyen om eygen baet.
[p. 67]
No 18.
Oucleercoopers & lombaerden, om stryt,
roepen altyts om eenen dieren tyt.
No 19.
Syen, lynen & wullen laken coopers, daer sy comen, fyn
soecken al doncker locht & gheen sonne schyn.
No 20.
Finansier, krygers & meesters van provande,
prysen al oorlogen, te water oft te lande.
No 21.
Stoffeerders & schilders, diet wel mocht seggen,
connen met lym & vernis wel olieverff leggen.
No 22.
Muelders, wevers & cleermakers, ist niet wat sots,
hebben gern veel stoffen & luttel beschots.
No 23.
Oucleercoopers oock wel nae den tert poogen;
sy comen haer selfs goet wel ter mert hoogen.
No 24.
Wegers & meters, ist niet een vremt bediet?
dees prysen al volcxken dat niet nau en siet.
[p. 68]
No 25.
Wyn & biertappers, mochtmen tquaet clappen,
connen wel twee prysen uyt een vat tappen.
No 26.
Eenen procuruer, die met dry regels een blat beslaet,
die practiseert om te worden een advocaet.
No 27.
Dus, als men int verstant wel vercloeckt,
soo ist wel te mercken hoe elck hem selven soeckt.
