[p. 169]
- XL - [Ghy, diemen geestelyc noemt in ons provinche]aant.
Ghy, diemen geestelyc noemt in ons provinche,
en sorcht niet, en vreest niet, en wilt niet vlien;
hoe wel dat nu peys is met den prinche
van Araengien, u en sal niet misschien;
want de staten des Lands hebben doen gebien
datmen u sal laten ongemolesteert.
Dus sedt op uwen huysraet sonder omsien,
u kercken, cloosters, eerlyc met belden stoffeert,
de stormers van desen syn nu gepanseert,
soo bekeert, & geworden als de goederhande.
Die tegen u hebben gerebelleert
syn onderwesen met volck van verstande;
het catholycx schipken, geturbeert met schande,
en sal wt syn haven niet meer soo swack // dryven:
al trecken de Spaenyaerds nu wt den lande,
syt te vreden, ghy sult in u gemack // blyven.
[p. 170]
Ghy sult noch ledich gaen & oock niet wercken;
deerste sitplaetse sult ghy oock behouwen;
men sal u noch Raby heeten in alle percken,
ghy sult noch bichten maechden & vrouwen,
ghy sult noch pelsen dragen tegen tvercouwen,
men sal noch voer u coopen de beste spyse
die ter merckt veyl comt in elcx aenschouwen:
daer en leyt niet aen al isse dier van pryse.
Ghy en sult noch gheven geen axcyse,
mer vry syn, al ist voer de steden cleyn profyt;
ghy en sult oock binnen uwen logyse
gheen soldaten houwen, om dat ghy geestelyc syt;
want ghy moet voer ons bidden talder tyt,
studeren & al werm onder tdack // schryven.
Ghy en sult oock niet waken, ist oorloge ost strydt:
syt te vreden, ghy sult in u gemack // blyven.
Ghy sult u ware even diere noch vercoopen,
want tgemeen volck heeft tot u een devoot opset.
Dus sullen sy om aflaet noch touwaers loopen
& onderhouden des Paus heylige wet;
sielmissen, wtvaerden & jaergetyden met
[p. 171]
sullen blyven even groot van crachten.
In manus tua, in u cuecken vet,
salt al volle vloet syn, by dagen, by nachten;
die gesongen missen, van gulden & ambachten,
sullen noch dagelycx worden gedaen;
u lange gebeden salmen oock salich achten.
Aldus suldy wel in uwen offer ontfaen;
ghy sult metten siecken noch metter schellen gaen;
ghy sult noch crygen in uwen sack // schyven.
Al hevet hier eens qualyc met gestaen:
syt te vreden, ghy sult in u gemack // blyven.
prinche.
Mindebroeders, princhelycke religiuesen,
u vette caken en syn noch niet gesmaelt;
al hebdy verjaecht geweest van de Guesen,
ghy sult noch halen, soo ghy hebt gehaelt,
den rinschen wyn met cruycken; hy sal werden betaelt:
men vint noch goey herten diet u wel jonnen.
Augystynen, prekerien, hout ongefaelt
u dorptermynen, soo ghy hebt begonnen;
[p. 172]
ghy sult gelt & cost crygen & bier met tonnen;
want de boeren syn tuwaert liberael & milt.
Spreeckt oock u cruysgebet, bagynen & nonnen,
ghy sult al hebben al wat ghy wilt,
& even vet gemest gaen, geborst, gebilt;
ghy en derft om taerten oft om geback // kyven:
tis touwent overvloedich; dus weest gestilt,
syt te vreden, ghy sult in u gemack // blyven.
