Vanden eersten soudaen ende anders.

Die eerste soudaen was gheheten zaracon, die was gheboren van meden ende was saladijns vader, die vinc ende doodde den caliphe van egypten ende wort daer of soudaen mit foertsen. Daerna was soudaen saladijn, jn wies tiden rikaert die coninc van ynghelant jn dien lande was met vele ander heren van kerstenhede, die hoedden den pas vanden rootsen, so dat saladijn niet lijden en mochte. Na saladijn regierde sijn sone roladijns ende daerna sijn neue ende na hem die comain, die eyghen waren in

egypten, deden hare macht daer toe ende coren onder hem enen soudaen, de welke hem dede heten melechsala. Jn dien tiden quam in dit lant die coninc van vrancrike sente lodewijc, die street met hem ende wart gheuanghen. Ende daerna so wort die soudaen van sijns selues eyghenen lieden versleghen. Ende daerna coren si enen anderen soudaen, die trupius hiet, die teliuereerde sinte lodewijc mids rantsoene van scattinghen Daerna een ander vanden comainen, die hiet cathas, doodde torqueman omme selue soudaen te sijn, als hij ooc was ende hi dede hem heten melichsemes. Ende daerna een ander vanden comainen, die hiet tendechlam, die doodde ooc melchemes omme te hebbene die heerscappie ende dede hem heten melechdan.

Binnen sinen tiden quam die goede edewaert coninc van ynghelant in surien ende dede den sarrasinen groten scade. Ende daerna wart dese soudaen in die stat van damas vergheuen ende zijn zone waende na hem regieren, om dat hi recht oor was ende dede hem heten melechsahic, mer een ander, die machtigher was dan hi, die hiet elphi, iaechdene vten lande ende maechte hem seluen soudaen. Dese soudaen wan die stat van tripole ende verderfde vele kerstene jnt jaer ons heren m ij^c. ende lxxix. Daer na so wart hi vergheuen van enen anderen die soudeen woude sijn, mer die wart staphants ghedoodt. Ende daer na wart ghecoren soudaen te sijn elphius zone, die hem dede heten melecasseras ende die wan die stat van akon. Ende hij verdreef alle die kerstene ende

hi wort namaels ooc vergheuen. Ende daerna wort sijn broeder ghemaect soudaen ende wart gheheten melechnasus. Doe quam een ander machtich man, die hiete gintelbaga ende die vinc melechnasus ende leidene in den casteel van montroiaul ende wart selue soudaen met fortsen ende dede hem heeten melech cadeb ende hi was van tartarien. Mer daer na jaechdene die comaine vten lande ende maecten enen van hem lieden soudaen, die hiet lachin, mar hi dede hem heten als hi soudaen was melechmauser, die welke speelde op enen tijt scaec ende sijn zwaert lach bij hem ende die ridder, die met hem speelde, wert al spelende opten soudaen erre ende met sijns selues swaerde, dat bij hem lach, soe doodde hine.

Daer na waren si in groten discoerde om te maken een soudaen, mar int eynde worden si van accorde ende macten melechnasar soudaen, die gintelboga hadde doen legghen in gheuanghenissen opten casteel vanden berghe royaul Dese regneerde langhe tijt ende regierde hem wijslike, soe dat sijn ouste sone na hem wort soudaen ghecoren ende was gheheten melechmadar, die doodde sijn broeder heymelijc om te hebbene sine heerscapie ende dede hem heten melechmaduron ende was soudaen, doe jc van daen schiet.