Reis van Jan van Mandeville


auteur: anoniem Reis van Jan van Mandeville


editeur: N.A. Cramer


bron: ‘Reis van Jan van Mandeville’ In: Instituut voor Nederlandse Lexicologie (samenstelling en redactie), Cd-rom Middelnederlands. Sdu Uitgevers/Standaard Uitgeverij, Den Haag/Antwerpen 1998.  


verantwoording

inhoudsopgave

doorzoek de hele tekst


downloads

© 2001 dbnl  


DBNL vignet

Den wederkeer van synay tot jherusalem.

Alsmen dan dese heylighe stede heuet gheuisenteert ende men weder wil keren tot jherusalem waert, men neemt oorlof an dese moneke biddende hem, dat si gode bidden voor hem lieden, die van daer scheden. Ende dan gheuen si den pelegrinen ghenoech van haren leuinghe om die wildernisse te liden te surien waert, die welke is wel xiij dachvaerde lanc. Jn dese wildernisse wonen vele liede, die heten darrabris ende beduis ende ascoparis ende sijn liede van quader naturen. Si en hebben en ghene huse anders dan tenten, die si maken van

[fol. 33ra]

huden of van vellen van beesten, die si tetene pleghen. Ende onder dese tenten wonen si ende legghen in steden, daer si water moghen vinden alse bider roder zee ofte elwaer. Want in dese wildernisse is alte grote breke waters. Ende het gheualt dicke, dat daer ment vint op enen tijt, daer men vindes op enen anderen tijt niet. Ende daer om en maken si ghene huse. Dese liede en winnen gheen lant noch ceren, want si en eten en gheen broot, het en si dat enighe van hem, die biden goeden steden wonen, daer in gaen ende etens sulken tijt. Ende si braden haer vleesch ende haren visch op die hete stene jeghen die zonne. Ende het sijn herde sterke liede ende wel vechtende. Ende deser is so vele sonder ghetal ende si en

[fol. 33rb]

doen niet noch en werken, ten ware dat si beesten jagheden omme tetene ende si en achten niet haer leuen. Ende daer om en ontsien si niet den soudaen noch ander princhen. Ende si hebben dicwille oorloghe ende strijt ieghen den soudaen ende souden wel dorren bestriden ten oorloghe, dade hi yet dat hem ieghen ghinghe. Ende sonderlinghe in dien tijden, doe jc daer was, hadden si orloghe ieghen den soudaen, want jc was doe met hem van sijnre mesnieden. Dese lieden en draghen mer een grote targie ende een glauie zonder andere wapene. Ende si bewinden ende behomplen haren hals ende haer hooft met enen witten groten slapelaken. Ende si sijn fel ende harde quaet ende vule van quader naturen.