Reis van Jan van Mandeville


auteur: anoniem Reis van Jan van Mandeville


editeur: N.A. Cramer


bron: ‘Reis van Jan van Mandeville’ In: Instituut voor Nederlandse Lexicologie (samenstelling en redactie), Cd-rom Middelnederlands. Sdu Uitgevers/Standaard Uitgeverij, Den Haag/Antwerpen 1998.  


verantwoording

inhoudsopgave

doorzoek de hele tekst


downloads

© 2001 dbnl  


DBNL vignet

Van herodes ende ander dinck.

Dese coninc herodes was herde quaet ende wreet, want hi dede eerst zijn wijf doden. Ende nochtans was hi daer na sint so erre daer omme, want hi mindese so zere, dat hi verwoedde ende was

[fol. 44vb]

langhe tijt sint buten sinen sinne; mer namaels quam hi weder daer in. Ende daer na dede hi doden ij scone sonen, die hi hadde van dien wiue voerseit. Daer na dede hi doden een ander van synen wiuen ende enen groten zone, die hi van haer hadde. Daer na dede hi doden sijn eyghene moeder. Ende hi woude ooc zijn broeder doden, mer sijn broeder starf haestelijc. Ende daer na dede herodes alt quaet, dat hi doen mochte. Ende te sinen lesten wart hi ziec ende als hem dochte, dat hi der doot niet ontgaen en mochte, hi en moste steruen, doe ontboot hi sijnre suster ende alle die grote heren vanden lande. Ende als si comen waren, dede hi alle die heren besluten in enen torne ende seide tot sijnre suster: jc weet wel, datmen van mijnre doot ghenen rouwe maken en sal; ende daer om so sweert ende ghelofde my, dat also zaen, als jc doot ben, dat ghi dese

[fol. 45ra]

heren haer hooft of doet slaen, te mits dat alle mijn lant groten rouwe make te mijnre doot, want anders en soudic niet beweent worden. Ende aldus sterf hi ende makede sijn testament. Mer die suster hielt hem niet sijn geloofte, want also saen als hi doot was liet si alle die heren gaen vten toorne ende lietse thuys waert varen ende seyde, hoe dat haer broeder gheordineert hadde, so dat herodes niet beweent en was, also hi waende. Ende weet, dat doe drie herodes waren coninghe, deen na dander ende waren vermaert van groter vreselicheyt. Die eerste hiet herodes canonites, die doodde die onnosele kindere, dander hiet herodes antipa, die dede sint jan baptisten onthoofden, die derde hiet herodes agrippa ende dede sint jacob doden ende sinte pieter vanghen.