Reis van Jan van Mandeville


auteur: anoniem Reis van Jan van Mandeville


editeur: N.A. Cramer


bron: ‘Reis van Jan van Mandeville’ In: Instituut voor Nederlandse Lexicologie (samenstelling en redactie), Cd-rom Middelnederlands. Sdu Uitgevers/Standaard Uitgeverij, Den Haag/Antwerpen 1998.  


verantwoording

inhoudsopgave

doorzoek de hele tekst


downloads

© 2001 dbnl  


DBNL vignet

Acheldemach velt des bloets.

Ende op dander zide vanden berghe van syon ten zuden waert op dander zide ten dale also verre, alsmen met enen steen mochte werpen so staet acheldemach, dat is dat velt des bloets, dat was ghecocht omme die xxx penninghe, daer onse here om was vercocht. Jn dit velt sijn vele tumben ende grauen van kerstinen, want men plach hier op te grauen die dode pelegrinen. Ende in dit velt zijn vele bedehuuskijn ende capellekijn ende clusen der heyligher lieden. Ende clusenaer plaghen daer in te wonen. Ouer dese stede op dander zide ten oosten waert

[fol. 47ra]

in c passen na ofte screden is die stat, daer men dat ghebeynte vanden doden vten gasthuse sinte jans voorseit in plach te legghene. Jtem op een mile na jherusalem west waert staet een kerke van onser vrouwen, daer si ontmoette ende groete sinte elizabeth haerre nichten, sinte jans baptisten moeder, doe si beyde groot mit kinde waren. Ende sinte jan ruerde hem in sijnre moeder lichame ende dede sinen scepper ere ende waerdicheit, doe hijs nochtans niet en sach. Ende onder den outaer van deser kerken es die stat, daer sinte jan gheboren wart. Van deser kerken in eenre milen na staet dien casteel van emaus, daer so openbaerde hem onse here ooc sinen jongheren na sine opuerstandenisse. Jtem op dander zide op ijc. vademen na jherusalem is een kerke, daer eens leeus hol plach in te sijn. Ende onder dese kerke xxx trap\pen

[fol. 47rb]

diep waren begrauen xijm maertelaers jn dien tiden vanden coninc cosdre, die welke desen leeu voorseit op enen nacht alle dede vergadren bi den wille gods.