Reis van Jan van Mandeville


auteur: anoniem Reis van Jan van Mandeville


editeur: N.A. Cramer


bron: ‘Reis van Jan van Mandeville’ In: Instituut voor Nederlandse Lexicologie (samenstelling en redactie), Cd-rom Middelnederlands. Sdu Uitgevers/Standaard Uitgeverij, Den Haag/Antwerpen 1998.  


verantwoording

inhoudsopgave

doorzoek de hele tekst


downloads

© 2001 dbnl  


DBNL vignet

Van den casteel saffra.

Jtem in .iij. milen na nazareth es die casteel van saffra, van welken alpheus zoon ende zebedeus zone waren.

[fol. 57rb]

Ende in .vij. milen na nazareth es die berch kayon, onder den welken staet een fonteyne ende daer neuen lamech noels vader doodde caym met enen ghescutte. Want dese caym ghinc op den berch ende steenrootssen als een beeste ende hadde gheleuet van adams tiden tote noes tiden, so dat hi aldus leefde wel .ij.c jaer ende doe doden noes vader, die blint was van outheden. Van saffra gaetmen ter zee van galileen ende totter stat van tyberien, die op die zee es gheleghen. Ende al ist datmen se zee heet, het en es gheen zee noch arm vander zee. Want het en es mer een riuiere van soeten watre, die wel is hondert stadien lanc ende xl. breet ende daer sijn in vele goeder visschen. Ende die jordane loopt

[fol. 57va]

in midden door dese stat van tybeyrien ende is niet herde groot, mer daer es vele goeds in. Ende daer die jordane haer sceedt van deser zee van galileen es een grote brugghe, daer ouer dat men lijt vant tlant van ghelooften totten lande waert sconincs van basen ende toten lande van gherascens, die alle sijn omtrent deser jordanen ende beghinnen ane die zee van tyberien. Ende van daer machmen gaen te damasch in drien daghen door tlant van trachionic, welc lant van trachonien duert vanden berghe van hermon totter zee van galyleen ofter zee van tyberien of totter zee van jonasar ende es al een zee. Want hets al dat water dat jc gheseit hebbe, mer het wisselt aldus zinen naem omder steden wille, die daer neuen lig\ghen.

[fol. 57vb]