Reis van Jan van Mandeville · dbnl

DBNL

Reis van Jan van Mandeville

auteur: anoniem Reis van Jan van Mandeville

editeur: N.A. Cramer

bron: ‘Reis van Jan van Mandeville’ In: Instituut voor Nederlandse Lexicologie (samenstelling en redactie), Cd-rom Middelnederlands. Sdu Uitgevers/Standaard Uitgeverij, Den Haag/Antwerpen 1998.

doorzoek de hele tekst

© 2001 dbnl

DBNL vignet


Waer die tafel ons heren is, daer hi na sijnre verrisenisse op at mit synen jongheren. Jn die stat van tyberien es die tafle ons heren, daer onse here mit sinen jongheren op at na sine verrisenisse, daer sine bekenden jnt breken van\den
[fol. 58ra]
brode, daer of dat ewangelium spreect: Et cognouerunt eum in fractione panis, dats te segghen: ende si bekendene int breken des broots. Ende bi dese stat van tyberien es die berch, daer onse here saedde v^m mannen met .v. ghersten brode ende met ij visschen. Jn dese stat warpmen enen brant na onse here met gramscapen, mar die brant vlooch in die aerde ende groeyde staphants ende wyes ende is een groot boom worden ende wast noch ende die scersse es daer of al zwart. Jtem opten eynde van deser zee staet een starc casteel ende hoghe, die saphor heet ende hi es bi capharnaum. Jn alt lant van belooften en staet gheen so starc en casteel ende beneden dese casteel staet een herde scone stat, die ooc hetet saphor.
[fol. 58rb]
Jn desen casteel was sinte anna onser vrouwen moeder gheboren. Ende daer onder was centurions huus. Dit lant is gheheten galileen ende daer sijn vele liede die ghegheuen waren den gheslachten van zabulon ende neptalim. En int wederkeren van desen casteel is die stat van dan, die anders gheheten is selmas ofte cesaria philippi, die gheleghen is anden voet vanden berghe van lybaen, daer die jordane beghint. Daer beghinnet tlant van promissioen, dats tlant van ghelooften ende duert inder linghden tote barsabee noortwaert gaende toten zuden ende es wel c ende l xxx milen lanc ende in die breede, dats van jherico tote japhe, houdet wel lx milen van lumberdyen.
[fol. 58va]
die clene sijn ende het en sijn niet milen van gasscongen, noch van prouinchen, noch van almangien, daer grote milen sijn. Ende weet, dat dit lant van ghelooften es in surien, want tconincrijc van suryen duert vander wildernissen van arabien tote celcilien, dats die grote armenien, dats te weten van zuden ten noorden waert ende van oosten ten westen waert ten groten wildernisse waert van arabien ende duert totter wester zee, mer jn dit conincrike van surien sijn vele prouinchien alse palestinen, sem, galylee, same, judee ende vele ander.