Noch van ander weghen te lande te reysen tot jherusalem.

Nv willic weder keren totten andren weghen, daer men meest gaet derwaert te lande. Die ghene die niet die zee en connen noch en vermoghen noch verdraghen ende die te lande begheren te gaen, nochtan datter meerre pijn toe moet zijn, men gaet in enigher hauene van lomberdien, alsoe alsic voor gheseit hebbe ende so comtmen in grieken ende dan te constantinoplen ende daer lijdtmen door die zee die sinte jorijs arm heet ende dan te raphinel, daer een starc casteel es ende dan te puluera ende dan ten casteel van sinoch. Ende van daer gaet men door capadochien dat een groot lant es, daer groot ghe\berchte

in es. Ende dan gaet men door turkien ter hauene van chieuetout ende ter stat van niken, dat in vij milen na es deser stat. Die van turkien namense den keyser van romen ende hets een sterke stat van muren ende van toornen. Ende op die ander zide staet een grote plaetse ende breet ende daer loopt een riuiere diemen heet lay. Van daer gaetmen door die berghe van noierement ende door die dale van malebrinis ende door die inghe weghe van desen rootsen ende door die stat van orinauls ofte door die steden, die sijn op die riuiere van reclar ende die riuiere van stanthoen, dat ij goede riuieren sijn. Ende dan gaet men te anthiochen die minre ende op die riuiere van reclai es

gheleghen. Daer omtrent sijn vele scoonre berghe ende bosschen ende wilder beesten een groot deel om wel te jaghene ende den tijt mede te cortene. Ende die wil, hi gaet op een ander zide door een pleyn van romanien houdende op die zide die zee van romanien. Op dese zide staet een scoen toorne ende starc, diemen heet florensen. Ende opwaert tusschen die berghe es die stat van thonesout ende die stat van langhimaach ende assere ende morminstre. Ende alsmen buten desen berghe coomt, so gaet men door die stat van marech ende van these, daer een grote brugghe es op die riuiere van ferne, die welke men ooc hiet

ferfer. Ende hets een herde grote riuiere sceep draghende ende loopt met enen harden fellen stroem ende coemt wt den gheberchten ende wt den steen roetsen vander stat van damasch wert. Ende daer loopt een ander riuiere die vten berghe comt van libaen, die albane heet ende loopt neuen damas. Dese riuiere ouer\lidende verloos sinte eustasius sijn twe kindre na dien dat hi sijn wijf verloren hadde. Dese riuiere lijt ouer die pleyne van archadeos ende gaet totter roder zee. Daer na gaetmen toter stat van fennine, daer sijn hete fonteyne die hete bade sijn ende daer na gaetmen ter stat van ferne. Ende tusschen fennine ende ferne staet een herde scoen bosch. Ende dan gaetmen te anthiochen, diere in x milen na es ende es een herde scoen stat ende wel gheuest mit muren ende mit toornen ende es herde groot

. . . . . want si plach te hebben ij milen in die lenghede ende anderhalue mile in die breede. Ende door die stat loopt die riuiere van ferne ofte van ferfer ende omtrent die muere plaghen te sine iij^c. ende .l. toornen ende telker pylaerne van dier brugghe plach een toorne te sijn. Het es die edelste stat van alden conincrike van surien ende in ix milen na dese stat es symeons hauene, daer loopt die riuiere van farsar in die zee. Van anthiochen gaetmen in die stat van caonie ende dan te gibel ende te tourtoise. Daer neuen es tlant van cananee, daer staet een starc casteel diemen heet maulech. Ende van tourtoise gaetmen te tripole ende men heeft te liden door die inghe weghen der rootsen. Ende daer

es die stat van jgibelet ende van beruch op die zee. Daer na gaetmen ter stat van acre ende daer sijn ij weghe om te jherusalem te gaen: die wech op die slinke zide gaet door damas ende neuen die riuiere der jordanen ende die wech op die rechter zide gaet door marine ende door tlant van flaganie neuen tgheberchte toter stat van cayfas, daer cayphas here of was, mar somighe liede hietent pelegrijns casteel. Ende van daer sijn wel iij dachuaerden tot jherusalem. Ende men gaet door cesarie philippi, door jaffe ende door rames ende door den casteel van emaus ende dan te jherusalem.