Van jops lant ende van dat conincrijk van caldeen.

Ende alsmen trect vter stat van cornaa, men comt in jobs lant, dat een scoen lant es ende vol van allen goede. Ende men heetet tlant sikese ende in dit lant es die stat van themain. Job was heydijn ende was redegofras zone ende hilt dit lant als een prinche van dien lande ende was so rike, dat hi niet en wiste thondertste deel van dien dat hi hadde. Ende al wast dat hi heyden was, nochtan diende hi onsen here met herten na sine wit. Ende onse here nam sinen dienst in dancke.

Ende doe hij in armoeden viel, hi had wel lxxviij jaer. Ende daer na doe onse here sine verduldicheit sach die groot was, hi setten weder in sijn rijcheden ende in sine macht ende was sint coninc van ydumea na den coninc esau ende doe job coninc was men hietene jobab. Ende in dit conincrike leefde hi c ende lxx iaer, so dat hi hadde als hi sterf cc ende xlviij jaer. Jn dit jobs lant en is breke gheens dincs, dies den menschen behoeft. Daer sijn vele berghe, daer men op vint herde vele manne, dats hemels broot, dat vele beter is dan datmen elder heeft. Manna dat es gheheten broot der ynghele ofte hemels

broot ende het es een wit dinc, herde soete van smake ende tedere ende es vele zoeter dan zeem of suker ende comt vanden dauwe des hemels ende leidt opt ghers ende opt cruut, dat in dien lande wast ende wort hert ende droghe ende wit van verwen ende soete. Ende men pleghet in medicine te doene ten riken lieden behoef om den lichame te slapene ende omme quaet bloet te purgeerne ende te suuerne. Want het suuert quaet bloet ende doet tegaen die melancolie. Dit lant van job paelt ant conincrike van caldeen. Dit conincrike van caldeen is herde groet ende die tale van daer is meerre ende duert

vordere dan enighe andere tale vanden lande van ouer zee. Men lijdt darwaert gaende neuen den torre van babylonien, daer of jc v hier voren seyde, daer alle die tale ende sprake vonden waren ende eerstwerf verwandelt waren ende is in dese zide van caldeen iiij dachuaerde. Jtem int conincrike van caldeen sijn die mannen scoon ende gaen herde rikelijc ghecleet ende ghepareert mit gulden hooft doeken ende haer cledre sijn mit orfrode gheboort ende ghechiert mit perlen ende mit dierbaren ghesteynten herde rikelijc. Ende die wiue sijn alte lelic ende qualic ghecleet ende gaen al beruoet ende draghen een keytiuich abijt wijt ende cort ende

die mouwen daer of sijn lanc ende wijt hanghende toten voeten ende hebben zwert haer omtrent die scouderen hanghende ende sijn ooc wel swert ende niet bruun, mer alte male lelijc ende hatelijc ende herde veruaerlijc te sien. Si souden my met rechte gheuen grote ghiften, om dat icse so sere prise. Ende seker noch es in hem so vele vulicheden meer, dat jc des niet en soude moghen ghescriuen. Ende in dit conincrike is een stat, die men heet hur, daer woonde thaere abrahams des patriarken vader ende daer wart abraham gheboren ende dat was in dien tiden, dat ninus was coninc van babilonien, van arabien ende van egypten. Dese ninus maecte die grote stat

van niniue, die welke noe hadde begonst te maken. Ende om datse ninus hadde vol maect, hiet hise na sinen naem niniue. Daer leit begrauen thobias die prophete, van den welken die heylighe scrifture sprect. Van deser stat van hur trac wt aberham ende schiet van daer bider gracien, gebode ende beuelen gods na sijns vader doot ende leide sarray sijn wijf mit hem ende loth siins broeders zoon, om datse gheen kinder en hadden ende ghinc wonen int lant van canaan in een stat, die men heet sichem. Ende dit was die selue loth, die behouden bleef, doe sodoma ende gomorra ende die ander steden verbernden ende versonken te afgronden, daer die dode zee is, also jc hier voor gheseit heb\be.

In dit lant van caldeen hebben si een zonderlinghe sprake ende sonderlinghe letteren, al sulke als hier na sijn ghescreuen.