Reis van Jan van Mandeville


auteur: anoniem Reis van Jan van Mandeville


editeur: N.A. Cramer


bron: ‘Reis van Jan van Mandeville’ In: Instituut voor Nederlandse Lexicologie (samenstelling en redactie), Cd-rom Middelnederlands. Sdu Uitgevers/Standaard Uitgeverij, Den Haag/Antwerpen 1998.  


verantwoording

inhoudsopgave

doorzoek de hele tekst


downloads

© 2001 dbnl  


DBNL vignet

Vanden lande van ethiopien.

Ethiopien is een groet lant ende strect hem tote in tlant van egypten. Ethyopien is ghedeilt in tween

[fol. 81va]

principalen perthien, dats van orienten ende van zuden. Ende die pertie van zuden es gheheten mortaengen ende daer is tfolc zwarter dan elwaer. Daer is een fonteyne, daer twater des daechs so cout is, dat niement en soude mogen drincken ende des nachts ist so heet, datter niement sijn hant in en soude connen ghedo\ghen. Ende op dander side deser perthyen ten suden waert lidende door die grote westersche zee is een groot lant, mer daer en moghen gheen lieden in wonen om der groter hitten wille vander zonnen, die daer so groot is. Ende in ethiopien sijn alle die riuieren doncker ende niet claer ende luttel ghesouten omder groter hitten wille. Ende alt

[fol. 81vb]

volc van dien lande wort zaen droncken ende en hebben ghenen groten lust van etene ende en sijn niet lancliuich. Jn ethiopien is menigherande volc. Ende men hetet ethiopien tussien. Ende daer sijn liede, die mer enen voet hebben, nochtan gaen si daer mede zo zere dat wonder is. Ende die voet is so breet, dat si daer mede maken scaduwe tieghen der zonnen op haren lichame auerecht te ligghen. Alse die kinder in dit lant gheboren worden, sijn si al greu ende als si groet worden is al haer haer zwart. Jn ethyopien is die stat van sabba, dat is tlant daer een vanden drien coninghen here

[fol. 82ra]

of was, doe si onsen here te bethleem sochten.