Reis van Jan van Mandeville


auteur: anoniem Reis van Jan van Mandeville


editeur: N.A. Cramer


bron: ‘Reis van Jan van Mandeville’ In: Instituut voor Nederlandse Lexicologie (samenstelling en redactie), Cd-rom Middelnederlands. Sdu Uitgevers/Standaard Uitgeverij, Den Haag/Antwerpen 1998.  


verantwoording

inhoudsopgave

doorzoek de hele tekst


downloads

© 2001 dbnl  


DBNL vignet

Van eenre stat gheheyten janathay daer dic coninck grote renten of heeft.

Van deser stat gaetmen voort int lant door menighe stat ende door menich dorp tot eenre stat, die men heet ianthay. Dese stat is edel ende rike ende profitelijc ende daer vaert men halen alrehande comanscape. Dese stat is herde profitelijc den here van desen lande, want hi heuet van dese stat alle jaer te renten, also die liede daer segghen, meer dan lm. tumase florinen van goude. Want si rekenen alle mit tumasen ende een yghelijc tumase is werdich xm. gulden florinen. Daer na machmen weten hoe

[fol. 109rb]

vele dat des jaers draghen mach. Die coninc van desen lande is herde machtich, nochtan is hi onder den groten can ende die grote can heeft onder hem xij sulker prouinchien. Jn dit lant is een goede costume in die goeden steden, want waer yement enen groten eten tijt sijnen vrienden maken wille, daer sijn toe gheset huse in een yghelike stat, daer men den waert gaet segghen: doet my morghen tetene ghereiden voir so vele lieden ende men seit hem tghetal ende men seit hem, wat men eten wil ende men seit hem ooc, hoe vele datmen verteren wil. Ende die waert sal hem staphants doen ghereyden wel ende scone, so dat dacr niet ghebreken en sal ende bat ende eer ende mit minren cost dan men in sijns selfs huus

[fol. 109va]

doen soude. Ende in .v. milen na dese stat ten ende waert van deser riuieren calay staet een ander stat, diemen heet monke. Jn dese stat is grote scepinghe ende alle die scepe sijn wit van naturen des houts, daer si of ghemaect sijn ende sijn herde scoon scepe ende groot ende wel gheordineert al warent huse in daerde ghefondeert.