Reis van Jan van Mandeville · dbnl

DBNL

Reis van Jan van Mandeville

auteur: anoniem Reis van Jan van Mandeville

editeur: N.A. Cramer

bron: ‘Reis van Jan van Mandeville’ In: Instituut voor Nederlandse Lexicologie (samenstelling en redactie), Cd-rom Middelnederlands. Sdu Uitgevers/Standaard Uitgeverij, Den Haag/Antwerpen 1998.

doorzoek de hele tekst

© 2001 dbnl

DBNL vignet


Hoe die keyser paep jan xiij crucen voer hem laet draghen, als hy striden wille ende veel ander wonders. Die keyser pape jan, als hi
[fol. 140va]
comt in bataelgien ieghen den groten can ofte jeghen enich andren prinche, die an sijn lant paelt, hi en doet ghene baniere voor hem draghen, mar hi doet voer hem draghen xiij crucen hoghe ende grote van finen goude ende van dierbaren ghesteente. Ende een yghelijc cruce is gheset op enen waghen ende ghehuedt van x^m. ridders ende meer dan c^m. man te voete, alsmen den standaert pleghet te doene hueden in onse lant, alsmen orloghet, ende dit ghetal van lieden is daer zonder ghetal van groten heren. Ende als hi gheen orloghe en heeft ende allene mit sijnre mesnieden rijdt, hi en doet voor hem draghen mer een simpel cruce van
[fol. 140vb]
houte zonder yet daer op ghemaect te sine van goude ofte van suluere in ghedinckenisse, dat jhesus cristus leedt den doot an een houten cruce. Ende hi doet ooc voor hem draghen een gulden platele vol van aerden jn ghedenckenisse, dattie edelheit ende die rijcheit van hem ende sijn vleesch sal ter aerden ghekeert worden. Ende hi doet ooc voor hem draghen een vat van suluere met juwelen van goude ende van dierbaren ghesteynten in tekene van sijnre heerscapien, van sijnre edelheit ende van sijnre macht.