Hoe den verloren Sone met de Roeckeloose ende met dat Verdorven kint int Bordeel ghinck.
NA desen is den verloren Sone metten Roeckeloosen en met dat Verdorven kindt int Bordeel ghegaen, daer hy vande vrouwen ghelijck een Prince ghetracteert is gheweest. Ende die Roeckeloose ende t'Verdorven kindt hebben hem even ghedienstich gheweest, want hy 't al te voren gaf soo langhe als hijt hadde. Vanden ghelaghe niet meer werckx makende dan oft slijck hadde gheweest. Ende als t'gheldt altemael verdaen was soo seyde die Roeckeloose tot hem aldus.
Mijn Heere ghy sult verstaen
Dat my die vrouwe hier doet vermaen
Dat u ghelt al uyt [is2)] ghegheven.
Den verloren Sone.
Wats daer aen bedreven
Dat en acht ick niet een gruys
Ick sal gaen tot mijns vaders huys
Ende crijghen daer wat in handen.
Maer vrouwe oft ick u brocht panden
Seght my weerdinne in rechter trouwen
[p. 12]
En soudy die niet willen houwen.
Ende tot dat ick gelt brochte, wech legghen.
De Weerdinne.
Heere t'is een ghemeyn segghen
Die gheen gheldt en heeft moet pandt laten.
Den verloren Sone.
Ick gae een luttel mijnder straten,
Tot mijns Vaders om mijn besach1)
Daer ick nemen sal dat ick mach
Dan come ick weder eer lanck
Daer mede adieu dit is ganck2)
Ende wilt hier een weynich toeven
Want ick ons ghenoech sal besoeven3).
