Hoe den verloren Sone al zijn goet onnuttelijcken met dobbelen ende lichte vrouwen overbrenght2).
En hoe hem die vrouwen naeckt ontcleeden, ende wech iaechden.
MEt de voorseyde iuweelen ende ghelt is den verloren Sone terstondt in 't Bordeel ghegaen by den Roeckeloosen by t'Verdorven kindt ende by de vrouwen die hem seer blijdelijcken ontfinghen. Met de welcke hy alle sijn gheldt ende juweelen onnuttelijcken overghebracht heeft met Dobbelen spelen ende hoveren, triumpheren ende met wech gheven, als dat hy ten lesten gheldt noch pandt en hadde, ten was al verteert ende omghebracht. Ende de Roeckeloose nu siende dat den verloren Sone gheen ghelt noch pant meer en hadde, seyde tot de Weerdinne aldus:
[p. 20]
Orsa1) Weerdinne ghy siet hoe 't gaet
Met mijns Jonckers staet
Nochtans om te verlaten2) de somme
Van t'ghene dat hy verteert al omme
Met spelen ende met vrouwen triumpheren
En sal hy t'ghelt niet moghen fineren3)
Maer hy is noch wel in 't habijt
Uwen ghast dit adverterende zijt
En al naeckt doet hem ontcleeden
Dan laet, hem loopen, dat hem moet geleeden
Den duyvel vander hellen.
[p. 21]
De Weerdinne.
Wy sullent soo stellen
Dat hy van hier scheyden sal sonder falen
Int hemde oft hy sal my betalen
Crijghet1) t'ghelt daer hy 't crijghen mach.
Sa Heere betaelt my sonder verdrach
Rasch siet dat ick betaelt sy.
Den verloren Sone.
Roeckeloose betaelt haer ghy
Terstont sonder langher dralen.
De Roeckeloose.
T'is waer, maer waer salmen t'gelt halen.
Den verloren Sone.
Waer is al t'ghelt bleven
Dat ick u metten silver hebbe ghegeven
Siet dat ghy haer te vreden stelt.
De Roeckeloose.
Vits bloet2) silverwerck ende t'ghelt
Is al verspeelt ende verteert met de vrouwen.
Den verloren Sone.
Dat mach niet zijn in trouwen
Soo veel gelts ende soo veel silver in so corten tijt.
De Roeckeloose.
T'is, ende van dien ghy noch tachter zijt
Thien croonen van gouwen.
[p. 22]
Den verloren Sone.
Hoe Roeckeloos wildy dan houwen
T'gene dat ghy hebt ghewonnen op my
De Roeckeloose.
Dat is sonder sy1).
Soudy dat weder te hebben meenen?
Den verloren Sone.
Neen ick in trouwen, maer gy sullet my leenen
Om de vrouwe te betalen daer met.
T'verdorven kindt.
Sy souden sot zijn die dat bestonden
Want dat gheldt dat is ghewonnen
En leent men niet gheerne.
De Roeckeloose.
Ick seght in gheenen scheerne4)
Leen ick u een mijte quade doodt moet ick sterven.
Den verloren Sone.
Waer sal ick dan ghelt verwerven
Ghy moet my bystaen in desen staet.
De Roeckeloose.
Op my en hebt gheen verlaet
Want ick u gheensins en sal
Leenen ghelt noch pant, ende al
Dat ick ghewonnen hebbe sal ick houwen.
[p. 23]
Lustich gheestken.
Wat mooghdy al brouwen
Heere wat batet nu ghesorcht.
De Weerdinne.
Na dat u niemant en verborcht
Soo suldy hier laten u habijt
Want sonder respijt
Wil ick betaelt zijn eer ghy van hier sult scheeden.
Den verloren Sone.
Soo moet ghy my dan ontcleeden.
De Weerdinne.
Wy sullen u liever al af rapen,
Totten hemde toe sonder blijf
Dan ghy niet betalen en soudt vuyl katijf1)
Men sal u leeren triumpheren.
Lodderlijck dierken.
En vuylbruyt2) wildy vrouwen hanteren
En t'goeyken3) quisten met groote hoopen
Sa, sa laet ons hem wt stroopen
Dese cleeren en daer met ghedaen.
De Weerdinne.
Nimmermeer en moet ic vande stede gaen
Noch broot steken in mijnen mont
En neem ick hem al terstont
Dat hy aen heeft die vuyle slabbaert.
[p. 24]
Die verloren Sone.
En neemt my toch niet dan den tabbaert
Ende laet my dwambeys ende cousen.
Die Weerdinne.
Hoe ghijt keert oft went
T'moeter al blijven cousen en wambeys met
Nu dat ghy t'onser ghenaden zijt ghesedt.
Her, her treckt hem al uyt sonder spoet.
Lustich gheestken.
Sa ioncker licht den voet
Want ghy moetet hier al laten
Maer uyt charitaten
Meuchdy aentrecken dees oude brockijns1)
Inder manieren vande kockijns2)
Noch eert men u te seere.
Lodderlijck dierken.
En hy willet maken den Heere
Hout daer treckt ane
Dees Leerskens dan loopt uwer banen
En weest noch amoureus.
Den verloren Sone.
Och valsch mensch waerom en comt niet fleus3)
Die doot u berooven met felder natien4)
Van d'leven onbeschent5) en rigoureus
Vermaledijt niet weerdich der gratien
Te leven inder werelt statien,
[p. 25]
Och wat heb ick ghestroyt, gheschint1)
Ick mach wel heeten t'verloren kint
Ende van elcken versteken2) zijn.
De Weerdinne.
Gaet, gaet vuyl cockijn
En vertelt wat ghy hier hebt vernomen.
Den verloren Sone.
Och Godt moest ick hier toe comen
Des mach elck van my wel walghen
Och al hinghmen my aen eender galghen
Soo hadde ick mijn recht gheheelijck
Want een regiment seer leelijck
Heb ick gheleyt het welck my rout.
Lustelijck gheestken.
Packt u wech vuyl catijf.
Lodderlijck dierken.
Wech, wech, vuyl rabout3)
Comdy soecken te glorieren4)
Bancketten maken ende goede ciere
Sonder te hebben om te volbringhen5).
De Weerdinne.
Den duyvel moesten6) hier met springhen
Dat segh ick u en niemandt el7).
[p. 26]
Lustich gheestken.
Wy connen onderhouden wel
Met blijschappen onghetreurt
Soo langhe alst geldeken duert
Aldusdanighe sotten.
Die Weerdinne.
Met lacchen met spotten.
Lodderlijck dierken.
Tot dat t'geldeken is verdaen.
Lustich gheestken.
Nu ioncker ghy meucht wel gaen
Oft loopen, want ghy en zijt niet verladen1)
Aen uwe cleeren.
De Weerdinne.
Men sal hem leeren
Metten vrouwen stoven en baden2)
Al was hy wilt, hy is nu die ghetemde.
Lodderlijck dierken.
Hoe moocht ghy badt3) int hemde
Ghestelt zijn
Wy en willen niet langher ghequelt zijn
Met hem, nu t'ghelt verteert is,
Want de geldeloose met niemant weert4) is
Dus mijn Joncker wilt verharen5)
Sonder sparen
Eer daer wat op u backhuys comt gevloghen.
[p. 27]
Den verloren Sone.
O duyvel ghy hebt my verleydt ende bedrogen
Dats my nu kennelijck voorwaer
In dese catijvicheyt swaer
Nimmermeer en sal ick my dorven vertooghen
Noch comen voor die ooghen
Mijns Vaders, noch comen t'sijnen huyse binnen
Och my dunckt ick sal ontsinnen1)
Aenmerckende mijn sondich bestaen
Och wat sal ick aengaen
My dunckt ick sal op der straten hier
Van hongher sterven schier
En al mocht ick my te dienen keeren
Ick ben veel te qualijck in de cleeren
Want ick heel naeckt ben en bloot
Och waerom en comt niet de doot
Dat sy my haelde uyt dese allende2)
Vermaledijt sy mijnder dwaesheydt bewende3)
Och sorghelijcke compaignie
Vol oneeren en vileynie4)
O fenijnighe putijnen5) quaet
Thoonende van minnen t'ghelaet
Maer t'is al bedroch
Dat merck ick nu wel, och, och
Soo langhe als duerde mijn ghelleken
Wast al: mijn Jonck-heere en lief geselleken
Maer nu sijt my al quijt hebben gemaeckt
Ben ick tot den hemde toe naeckt
Versmadelijck verdreven veriaecht
[p. 28]
Maer wat batet vele gheclaecht
Ick moet gaen soecken met allinden
Oft ick niemanden can vinden
Dat ick toch mochte den cost rapen
Al soude ick in stroo slapen
En teghen den hongher en dorst groot
Water drincken en eten drooch broot.
2)er door jaagt
1)Welaan
2)De juiste lesing blijkt niet. A heeft: verstaen, C verlasten; de bet. moet zijn: afdoen, betalen
3)Vinden, verkrijgen
