[p. 5]origineel
[Lof altijt Jhesu ende Marie]
O Sinnen / memorie / verstant ende cracht
Wilt hier nu baren u uuterste macht+
Om loven den genen dye ons heeft
gewracht+
Met sijnder moedere+
Die ons heeft gebaert dalder salichste dracht+
Daer so menich mensce na hadde ghewacht
Geroepen / gecreten / beyde dach ende nacht
Dits nu ons broedere+
Ons voedere / een leeraer / bereet om leeren
Die sijn leeringe volcht wert lancx so vroedere
Noyt geen verwoedere dan die van hem keeren+
Dus laet ons hem loven als heere der heeren+
Sijn eere vermeeren met herten blije
Al hebben wi misdaen laet ons niet verseeren+
Maer leggen hem teeren tis noch te tije
[p. 6]origineel
Lof altijt Jhesu ende Marie
Lof kint en moedere / als scriften orconden
Lof moeten u spreken / alle monden+
Tot uwen sone / is elckerlijc verbonden+
Groote ende cleene+
Lof moedere / u weerde / en is niet om gronden
Lof kint / die tverloren scaepken hebt vonden+
Dwelc ghi gewasscen hebt / van sinen sonden+
In u bloet reene.
Wi hadden misdaen / ghi paeydet alleene+
Voor ons gemeene / door u bitter doot
Lof kint en moedere / onsen troost in weene+
Ooc anders geene / inder meester noot
Lof spise der sielen / lof hemels broot
Lof mondeken root / lof ic u belije
[p. 7]origineel
Ghi sijt onsen hals / en Christus ons hoot+
Tserpent voor u vloot / de veninege prije+
Lof altijt Jhesu ende Marie
Lof roose van Hierico / aent cruce bloeyende+
Lof Maria goutbloeme / in duechden groeyende
Fonteyne dontfermherticheyt / vloeyende+
Elcken mensche bereet
Lof kint en moedere / sijt tonswaert spoeyende
De tacxkens van onduechden / sijt af snoeyende
Ons sceepken ter rechter havenen roeyende
Duer lief en duer leet
O David victorieus / die Golias wreet+
Sijn hooft af sneet / wilt ons beraden
Ghi hebt aen getogen / ons menscelijc cleet+
Door u liefte breet / en wilt ons nye / versmaden+
[p. 8]origineel
Maria staet ooc u dienaers in staden
Moeder der ghenaden / sidi ghije.
Wi ballingen belast / helpt ons ontladen
Van alle quaden / ons u kint bevrije
Lof altijt Jhesu ende Marie
Lof licht der werelt / gesontmaker / vercoren+
Lof reyn vyolette / roose sonder doren
U loven oock alle / devote doctoren+
Boven alle vrouwen
Voor u vreesen en beven / de helsche moren
Duer u vrucht / hebben si den roof verloren+
Dye si wel vijf duysent / jaren te voren
Hadden ghehouwen
Lof kint lof moedere die in u betrouwen
Twert hem wel vergouwen / ghy vrijtse
van trueren
[p. 9]origineel
Die u eere beletten / moetmen verspouwen
Hem mach wel grouwen / eer si sterven besueren
O Maria u prijsen alle scriftueren
Helpt ons gedueren / vroom inden strije
Die tuwer eeren dit lof sullen rueren
Ons woort wilt vueren / voor de personen drije
Lof altijt Jhesu ende Marie
Lof prince inder hoochster / jubilatien
Schoon suver princesse / crijcht ons veel gratien
Op dat u lof / alle christen natien
Neerstich betoghen
De weerelt is al omme vol turbatien
Vol erruers / vol tweedrachts / en arguatien
Die goede die lijden / so veel temptatien
Slaet op ons u oghen
[p. 10]origineel
Tes ons scult / heeft ons de viant bedrogen
Waen heeft ons gelogen / en ons selfs behagen
Reyn moeder wiens borstkens / Christus heeft gesogen
Siet op ons doghen / aenhoort ons claghen
Aen uwen lieven sone verbidt de plagen
Nu in onsen dagen op dat duecht bedie
Neemt de scapen waer / wilt wolven verjaghen
Als si ons belagen met haerder fantasie
Lof altijt Jhesu ende Marie
