[p. 11]origineel
Wilt op ons slaen u minlijc ghesichte+
Bescermt ons slichte van sviants schichte
Wi arme crancke
Even kinderen roepen met grooten gejancke
Reyn lichaem bewaert van sondigen stancke
Ghi hebt ghedraghen
De druve wiens wijn alder soetste van drancke+
Pharao versoende / o vruchtbaer rancke
Aenhoort ons claghen
Cedrus die de helsce slangen condt verjagen
Ghi verbidt de plagen die in onsen dagen
U kint soude opter werelt sinden
Dus seggic stoutelic sonder versaghen
Die troost aen u soect die sal troost vinden
Lof coninghinne Hester ons advocate+
[p. 12]origineel
Die anders seyt te rechte ic hate
Ghi helpter vele uuten sondigen state
Met uwen ghebeden
Ghi toont u borsten inde hemelsce strate
Uwen lieven kinde vroech ende late
O soete granate / boven honich rate
Dorpen en steden
Sijn door u verlost / in tiden voorleden
Verwerft ooc nu / opten dach van heden
Vrede den lande
Cisterne / daer drie stercke om streden+
Tserpents hooft hebdi / met voeten getreden+
Wijse van verstande
Moyses doren / die sonder verbranden brande+
Bemuerde warande / bewaert voor schande+
Dwaes waren si die u niet waerdich kinden
[p. 13]origineel
Voor u eere sette ic3 mijn lijf te pande
Die troost aen u soect die sal troost vinden
Reyn balsem / gaerde / wellustich pryeel+
Uwen roke / gaet boven balsem / en caneel+
Salomons paleys onwinnelijc casteel
Bloemken sonder bleyne
Eva bracht de doot / dat bitter morceel+
Maria bracht dleven / het beste deel+
Dat costelijc juweel / gods sone geheel
Voor ons alle ghemeyne+
Dwoort / wert vleesch in u / goods deerne cleyne+
Ezechiels poorte / gesegelde fonteyne+
Spieghel onbesmet+
Velt vol bloemen / heel effen en pleyne+
Cedar / palme cypresse magelyne
[p. 14]origineel
Op lybano gheset
Lof tafel daer den vinger gods in screef de wet+
Die u eere belet hoe grooten cadet
Si werden geplaecht die hem des onderwinden
Maer u dienaers bescermt ghi voor sviants net
Die troost aen u soect die sal troost vinden+
Lof riviere / daer honich / ende melc uut
vloeydt+
Heilige eerde / daer Moyses / op trat / ontschoeyt+
Gedeons vlies / met hemelscen / dauwe / bespoeit
Gods sone op u loech
Stock daer si op rusten / die sijn vermoeyt
Leydtsterre / daer menich / sceepken / na roeyt
Aarons roede / gegroeyt / vruchtbaer ghebloeyt+
Sonder misch oft ploech
Wage / daerment hemelsce gout in woech+
[p. 15]origineel
Roede / die den hertoghe / van Moab sloech+
De heere der heeren+
Heeft sijn tabernacule geheylicht seer vroech+
Wijse Delbora / men can u niet ghenoech
Te vollen gheeeren
Hemel en eerde / moeten u lof vermeeren
Gheerde sonder weeren / so scriften leeren+
Tot uwen love / wil ic mi verbinden
Wilt u minlic / aenscijn / van mi niet keeren
Die troost aen u soect die sal troost vinden
Moederlijcke maecht / aensiet / ons oogen wrijven+
Troost doch u kinderkens / sonder bekiven
Duve / ghi bracht ons / dat tacxken van oliven+
Des hebt eewighen prijs
Schoon Rebecca / wie sal / u lof volscriven
[p. 16]origineel
Arca Noe / diemen ongescint sach drijven+
Doen mans en wiven / verdroncken moesten bliven+
Na scriftuerlijck bewijs
Noyt mensch / so vervrosen / int sondich ijs
Die troost aen u sochte / hoe out / hoe grijs
Hi creech ghenade.
Van uwen lieven sone / dits mijn avijs
Jherusalem / gods stadt / eertsch paradijs
Godlijcke schapprade
Tresorye / camer vanden hooghen rade
Soete sucade / van Davids sade+
Bidt uwen kinde / voor ons arme blinden
Dat wi muegen geraken / ten rechten pade
Die troost aen u soect die sal troost vinden
Lof claren hemel / sonder wolcken oft swercken
[p. 17]origineel
Die dmanna / regende: dat ons mach stercken+
Naer u riepen / coninghen / en patriarcken+
En oock propheten
Ghi sijt den hals / in dlichaem der kercken
Daer gracie door vloeydt / so elck mach mercken
Onder u vlercken / schuylen / leecke en clercken
Doctoren poeten
Dinghelen / en souden / u weerde / niet meten
Troon / daer coninc Salomon in heeft geseten+
Thelsche serpent+
En heeft u noyt vore / noch na gebeten
Sonder erfsonde ontfaen / door gods secreten
Maghet excellent
U vrucht beroofde / dat helsche convent+
Gods liefste present / hem altijt ontrent
Ghi rust nu soetelijc / op uwen gheminden
[p. 18]origineel
Svaders bruyt / soons moeder / tsheylich geests instrument+
Die troost aen u soect die sal troost vinden
Lof roose / van Hierico / wijde ontploken+
Oven / daer drie personen tvier in stoken
In wien de heilige geest heeft willen coken
Dlevende broot
Maria / uwen nardus / heeft so geroken+
Dat den hemel ontsloot / die stont geloken+
Boec sonder croken / ghi hebt gewroken
Alder vroukens noot
Adam adt de vrucht / die hem Eva boot+
Waer duer si ons brachten / in deewige doot
Ghi bracht ons ten peyse
Arca / binnen / en buten / heel gulden root+
Judith / die Holoferni / af sloecht sijn hoot+
[p. 19]origineel
Tuwaert ick deyse
U dienaers comen / ten hoochsten paleyse
Ten helscen forneyse / leydt der ketters reyse
Die u blameren en so haer leven inden
En sullen hen niet verbranden aen de heyse
Die troost aen u soect die sal troost vinden
Alderscoonste princesse / wilt ons verhoren+
Natuerlijc / van Adams stamme geboren
Noyt besmet als de roose / groeyt biden doren+
Al dinghelen singhen
Boven uwen lof / inde hoochste choren
Ingelsce vrouwe / ghi vondt dat was verloren+
Juechdelijc thoren / wit van yvoren+
Niet om bedwinghen+
Sterc slot / daer dusentich scilden uut / hingen
[p. 20]origineel
Salomons bedde dair tsestich stercke om gingen+
Gouden candelare+
Mans / vrouwen / maechden / en jongelinghen
Wilt als David devoot / voor darcke springen+
Clinct der herpen snare
Princesse gecroont / inde hemelsce scare+
Bidt voor den sondare / gods weertste care
Bedwingt den helscen leeu / die ons wilt verslinden
Ick derf wel segghen / int openbare
Die troost aen u soect die sal troost vinden
