Refereyn.
O Onsinnighe menschen verblindt verdooft
Hoe deerlijc laet gy u dnet trecken over thooft
Dat ghij hebt verlaten /
Tgheloove / sijt ghy heel uwer wysheyt berooft?
Versmaeyende de kercke / ghy boeven ghelooft+
En apostaten /
[p. 45]
Die doude ketterije langhe verwaten
Hebben vernieut / vermeerdert / duer haer boos verstant
En ghesaeyt onder heeren en ondersaten
In menich lant
Schaempt ghy u niet / dat ghy met ketters aenspant?
Sonder persecutie oft travaelgen
En dat ghy om dansen houdt ane de handt
Met soe vuylder rapaelgen
Want tes meest volcxken van lichter taelgen
Al tgheene dat Luthers leeringhe behaecht
Ghy die wilt gherekent sijn voor groote caelgen
Schaempt u / dat ghy Christenen name draecht.
Al wilt ghy som voor lien van eeren gheacht // sijn
Om dat gy muecht rijcke en van grooter macht // sijn
Tes goet te merckene /
[p. 46]
Dat gy moet wanckelbaer / en een lichte vracht // sijn+
Hoe soudt gy anders / soo gheringhe bedacht // sijn
Naer wat nieus te herckene
Ghy wildt u mesten / ghelijck den verckene
Slampampen / boeleeren slapen totter noene
U en lust niet in gods wijngaert te werkene+
Oft duecht te doene
Hier om syt ghy van Luthers / opinioene
Ghy oordeelt u wyser / en beter te syne
Dan u ouders slachtende den capoene
Dus laeckt ghy / haer doctryne
En suycht uwen balch / vol van Luters venyne
Waer duere / ghy in alder duecht vertraecht
Wildt ghy inden hemel comen sonder pyne?
Schaempt u dat ghy / Christenen name draecht
[p. 47]
Wat pordt u Luthero / ghehoor te ghevene?
Wiens discipulen meest sijn / boos van levene
Merckt wel haer bedryven.
Vanden / Sacramenten / oec alle sevene
En van gods moeder / de hoochste verhevene+
Sy blasphemich scryven
Sommighe der Saduceen secte verstyven+
Selck loochenen / de helle elck macht bethoonen+
Dander vermoorden / haer eyghen wyven
Dit sijn u patroonen
Luther / es de hinne al wilt ghijt verschoonen
Die alle dees kiecxkens / uut heeft ghebroeydt
Hy es de wortele / en laet u niet hoonen
Daer dit oncruydt uut groeydt
Tfy dat ghy u met sijnder ketteryen moeydt
En daer siele / lijf / ende goedt / om waecht
[p. 48]
Ick segghe noch want ghy sijt weerdt verfoeydt
Schaempt u / dat ghy Christenen name draecht.
Ghy muecht u wel schamen dat ghy u laet tellen
Met hen die kercken rooven en capellen
Als Machometisten /
Steden verraden muterie opstellen
Sijt ghy liever gheacht met desen ghesellen
Dan metten papisten?
Ghy houdt u selven voor Evangelisten
En devangelie beleeft ghy niet een haer /
Ons ouders dies op haer duymken niet en wisten
Hieldent beter voorwaer /
Ick derf wel segghen / dat over hondert jaer
Onder de vreemde / was meer lieften en trouwen
Dan nu tusschen vader en kint / het blijct voorwaer
[p. 49]
In elcks aenschouwen
Ghy roept al liefte / wie sietse u houwen
Want ghy papen / en muncken tvleesch af / knaecht
Uut nijde / en weet ghy / wat venijn uut spouwen
Schaempt u / dat ghy / Christenen name draecht.
O vernufte gheesten / waer sijn u sinnen?
Ghy mocht u wel schamen / in u herte binnen
Die soe ghedichtelijck
Sonder vier / oft sweerdt / u laet verwinnen
U onghestadicheyt / hebt ghy laten kinnen
Want ghy soe lichtelijck /
Verlaet het gheene / dat soe voorsichtelijck+
Duer den heylighen gheest es gheordineert
Vanden heylighen mannen die so ghestichtelijck
Hebben gheconverseerdt /
[p. 50]
Wiens leere / met miraculen es gheprobeerdt
Wat miraculen gheschiender / bringtse doch voordt
Duer Luters leere / die ghy soo laudeerdt
Dieverie / en moordt.
Verraderye twist / die heel kerstenrijck verstoordt
Soe dats hen schier / geestelijc en weerdelijc beclaecht
Siet ghy dit niet sijt ghy droncken / oft versmoordt
Schaemt u dat ghy / Christenen name draegcht
Vrome Christenen / Princen / en princessen
Wacht u / voer de clercken ende clergessen
Die in doncker holen
In bosschen / in haghen / leeren haer lessen
Twillen al doctooren sijn en doctoressen
Maer certeyn sy doolen?
God en heeft alle menschen niet bevolen
[p. 51]
Scriftuere te verstane / maer elcken betaempt+
Die te gheloovene / dus schoudt de scholen+
Daer dees bende versaempt+
Wildt ghy ooc voor gheen ketters sijn befaempt
Gheeft hen gheen credentie hoe stijf sijt blasen
Al willen sy goedt Evangelis sijn ghenaempt
Tsijn al vijsvasen
Sy vercoopen u brillen / sonder glasen
Dus vlietse als serpenten / eer ghy werdt geplaecht
Want hoordt ghy naer tgheene / dat ketters rasen
Schaempt u dat ghy / Christenen name draecht
Aenmerckende den tijdt nu voor ooghen claer
Stelde ick dit dicht voor een niewe Jaer. An. 1532.
