[p. 62]
Een glorioos sottoor / een aerdich stutere
Heetmen inde stadt van Wittenberghe
Een nieu Evangelist bet hiet hy een mutere
Viandt der priesters / der leecken loeftutere
Die den menschen maeckt / conscientie lerghe
Dese verstaet de schriftuere totten merghe
Tschijndt hy is alleene der sielen spysere
Dou doctooren hebben gods woordt verkeerdt in erge
Sy hebben ghesust haer trompen slaen ysere
Luttel yemandt es haerder leeren prijsere
Want sy segghen datmen gods ghebodt moet houwen+
Penitentie doen / neen / Luther es wysere+
Die leerdt ons alleene / in god betrouwen
Ghelooven en hoopen wat wy voort brouwen
Tes alleleens weert goedt es oft quaet
Want hier op te werc gaen / bey mans en vrouwen
[p. 63]
Hier om eest dat nu soo wel in de weereldt gaet
De Lutheranen / sijn al gods totter sielen
Sy seghenen de kercke / metten hielen
Sy willen hen wachten van afgoderyen
Sy eeren Mammon / en willen niet knielen
Voor tcruys ons heeren / maer willent vernielen
En mueghen niet lyden den sanck der clergyen
Maer in Bachus kercke / hooren sy de ghetyen
Daer Venus clercken / int wilde singhen
Vleeschelijcke liedekens / daer sy in verblyen
Met brassen / boeleeren / sy den tijdt duerbringhen
Dits dabstinentie / daer sy tvleesch me dwinghen
Mueghen sy dus in hemelrijck varen
Met bommen met fluyten / met dansen / met springen
Soo radick hen dat sy gheen schoenen / en sparen
[p. 64]
De kercke heeft gedoolt vijfthienhondert Jaren
Trecht gheloove is nu vonden / diet gade slaet
Wantter noeyt dan nu goey / Christenen en waren
Hier om eest / dat nu soe wel inde weereldt gaet
Maer als ick scherpe / mijn inwendich ghesichte
So dunckt my dat van Luthers nieuwen lichte
Alle de heel weereldt / es verduystert
Doen / Christus sijn kercke duer Dapostolen stichte+
Sy baden / en vasten / even ghedichte+
Luther bringt nieu tijdinghe daer elc naer luystert
Men derf niet vasten / al dat gheerne smuystert
Dat steeckt hier ane / haest sijnen seghele
Tgoedt is ghemeene / hier duer elck pluystert
Als kersten bruerkerns / van Judas reghele
Tvolck moest voortijts leven / op eenen peghele
[p. 65]
De Christenen waren te seere beswaert
Met menschen statuten / noyt herder vleghele
Nu es ons een nieu licht gheopenbaert
Dats Luther / voerende Wiclefs standaert
Die leert verachten spaus ban / en skeysers mandaet
Om dat hier in veel menschen volghen sijnen aert
Hier om eest dat nu soe wel inde weerelt gaet
De menschen waren hier voortijts al dwaes+
Die met penitentien / tvleesch dooden bynaes+
Ghelijck in Egipten / doude heremyten
Cruydt / wortelen vruchten / dat was haer aes
Ick wedde de Lutheranen / sijn wyser jaes
Men sal hen vrylijck niet derven verwyten
Datse hen met abstinentien verslyten
Die paters die laghen / in bosschen / in hegghen+
[p. 66]
Heeten sy werckheylighen / en ypocrijten
Drinckt wijn / eet capoenen / met witten wegghen
Inde vasten als daer buyten wat papen segghen
Achtet oft een hondt bies ja noch veel min
Dits Luthers leere / die can gods woordt uut leggen
Badt dan doude doctooren deden int beghin
Die leydent al uutte nae den gheestelijcken sin
Luther spreeckt voor tvleesch als trou advocaet
Want selc met svleesch lust / waent crigen der sielen gewin
Hier om eest dat nu soo wel inde weerelt / gaet
Men moet scriftuere preken / naer de lettere
Die legenden preeckt / dat es een kettere
Laet der doctooren boecken int vier al smacken
Want Luthers boecken die sijn veel nettere
Die salmen ghelooven noch maecktment vettere
[p. 67]
Dier teghen wou segghen soumen schier sacken
Men vinter soe vele / die aent cantken lacken
Van Luthers leere meest elck wilt hucken
Om dat de Lutheranen naer gods woordt dus snacken
En sietmen donnoosele niet meer verdrucken
Sy en souden niet gheerne een besiken plucken
Ten ware op haers vaders erve ghewassen5
Al breecktmen kelcken cyborien ontstucken
En tsilver / en tgoudt vander sancten cassen
En dat sy op gheen heylighen en passen
Dats om dat haer herte / alleen op Christum staet
Wantse dus deen duecht op dander tassen
Hier om eest dat nu soo wel inde weerelt gaet
De Lutheranen willen heel god vruchtich // sijn
Int Christen gheloove seer doorluchtich // sijn
[p. 68]
Tschijndt sy sijn vol lieften / en charitaten
Maer want sy inder tonghen seer cluchtich // sijn
Ten sijn niet dan woorden soudic beduchtich // sijn
Waren sy soe vol lieften / als sy blaten
Sy en souden papen muncken / dus niet haten+
Want consten sy / elck soude haer lever eten
Al wisten sy quaet sy soudent by hen laten
Nu segghen sy quaet / daerse gheen en weten
Hadden sy liefte / so sy hen vermeten
Sy souden haers naesten cranckheyt draghen+
Ende voor hen bidden sonder vergheten+
Niet beclappen / belieghen / vervolghen / verjagen+
Consten sy al souden sijt worghen / en craghen
Gheestelijck en weerlijck dat haer secte versmaet
Wantse in dees liefte groeyen alle daghen
Hier om eest dat nu soe wel / in de weerelt gaet
[p. 69]
Datse de beelden willen werpen uutter kercken
Tcompt al uut gods liefte / tes goedt om mercken
Aen de beelden diese in haer cameren stellen
Dats alle boeverye daerse tvleesch me stercken
Om te meer begheeren onchuysche wercken
Recht oftse de duvel / niet ghenoech en mocht quellen
De figueren / die hen mochten vertellen
Wat de sancten / om Christum hebben gheleden
En mueghen niet sien / dees Luthers ghesellen
Want de wercken / die de heylighen deden
Behaghen hen niet / want sy straffen haer seden
Dus willen sy de memorie uut schrabben
En want syse niet heel en cunnen vertreden
Sy blasphemeeren / sy spotten / sy gabben
Die niet gheslaen en can / moet byten / en crabben
Want devangelibruers / die saeyen dit saet
[p. 70]
Al willen wasschen en hem selven beslabben
Hier om eest / dat nu soe wel inde weerelt gaet
Prince / de Lutheranen sien wel een stof
In haers broeders ooghe maer den balck seer grof+
In haer eyghen ooghe / sy niet en begrypen+
Sy soecken al oncruydt / in der papen hof
Die hen niet en preken naer den nieuwen snof
Oft niet en willen dansen / naer Luters pypen
Dat sijn al boeven / maer voorwaer sy nypen
Hen selven / metter nuesen dat wil ic proeven
Al hebben sy schoon huysvrouwen / sij schieten strypen
En dat wijf en kindren / wel souden behoeven
Hanghen sy aen hoeren / hoe sij dwijf bedroeven
En achtense niet seere / dus sonder falen
Al waer een man iemandt schuldich twee boeven
[p. 71]
Hy sou met eenen Lutheraen wel betalen
Dit sijnse die der papen ghebreken verhalen
En tot allen naelden weeten eenen draet
Want dit gheslacht seer groeyt onder Duytschen en Walen
Hier om eest dat nu soo wel inde weerelt gaet
