Refereyn.
SOnder geloove en mach niemant salich werden+
Tgheloove es tfundament sterck int volherden
Maer daer moet volghen salmen ten hemel raken
Hoepe ende liefte ende ooc ten derden
Dat wy gods gheboden niet over en terden
Maer onsen roep / duer goey wercken seker maken+
Tgheen dat wy ghelooven niet en versaken
Metten wercken levende als gods vianden+
Al waert dat wy met engelschen tonghen spraken
Berghen versetten / duer ons ghenaken+
[p. 72]
Voor ons gheloove ons lieten verbranden
En om gods wille gaven alle ons panden
Es ons gheloove niet werckende uut minnen
Het sal ons gherekent werden tot schanden
Al tgheen dat ghy doen muegcht met uwen handen
Dat doedt seydt de wyse man wildt vroech beginnen+
In gods wijngaert te wercken / voegcht u sinnen
Van uwen loone en werdt ghi niet falich+
Gheloove sonder wercken / en maeckt niet salich+
Tgeloove sonder werck es een lamp sonder smout
Een onprofijtelijck boom een onnut hout
Daer bladeren en gheen vruchten aen en cleven
Dus dolen sij seere die segghen soo stout
Tgheloove alleene / dits haren cout
Sonder wercken mach ons den hemel gheven
[p. 73]
Ghelooft ghy datter een god is stater gheschreven?+
Ghy doedt wel maer sonder meer en salt u niet baten
De duvels gheloven dat ooc en sy beven+
De dwase maechden sijn uutter bruyloft bleven+
Om datter gheen olie en was in haer vaten
Daer salder veel cloppen uut diversche staten+
Die duvels verjaecht hebben / en ghepropheteerdt
Sy en selen niet binnen werden ghelaten
Maer Christus sal segghen gaet uwer straten+
Ghy boose wercklieden dit wel grondeerdt
Ghy die van uwen gheloove glorieerdt
En in goede wercken te doene syt / dralich+
Gheloove sonder wercken en maeckt niet salich
De rechtveerdige leeft duer tgheloove rijckelijck+
Soo ons scryftuere seydt Auctentijckelijck+
[p. 74]
Maer wie es rechtveerdich dan diet int werck bewijst?+
God boven al mindt ende des ghelijckelijck+
Synen naesten als hem selven onwijckelijck+
Tgheloove dat van binnen int herte rijst+
Werckende duer de liefte openbaer+
Dat es tvolmaeckt gheloove dat Paulus prijst+
Maer tes een doodt gheloove daer gode af grijst+
Daer gheen wercken / met allen en volghen naer+
Abraham werdt rechtveerdich duer tgeloove maer+
Hadt hy uut den gheloove gheen wercken ghedaen+
Wat soudt hem ghebaet hebben / niet een haer
Maer hy liet duer tgheloove al wast hem swaer
Sijn landt / ooc es hy opten berch ghegaen+
Om sijn kindt te offeren duer gods vermaen+
Di werckende gheloove maeckten liefghetalich
[p. 75]
Gheloove sonder wercken / en maeckt niet salich+
Christus paeydt ons van desen gheschille
Int Evangelie / gheeft hy ons een stercke pille
Teghen tvenijn van allen valschen propheten
Een knecht die wel weet sijns heeren wille+
En dien niet en doedt openbaer oft stille
Die sal met veel roeden werden ghesmeten
Meer dan den gheenen dies niet en weten
Verdrachlijcker oordeel / sal den heydenschen lien
Gheschien dan den kerstenen / die hen vermeten+
Van haren gheloove ende wercken vergheten+
Die god wilt / dat uutten gheloove gheschien
Laet u licht schijnen seydt Christus dat de menschen sien+
Sijn de Zodomyten in sulphuer in peck versmoordt?+
Waer selen dan de boose Christenen vlien
[p. 76]
Welcken god meer gratien heeft gethoondt dan dien
Werdt Christus anderwerf duer haer sonden vermoort+
Beter hadt gy den wech der waerheyt tes Petrus woort+
Noydt gekendt dan dien kennende daer uut loopt dwalich
Gheloove7 sonder wercken en maeckt niet salich.
Niet alle die segghen heere heere+
En werden salich seydt Christus tonser leere+
Maer die den wille doen van mijnen vadere+
In alle dinghen soecken sijn godlijcke eere
Niemandt en stae op sijn gheloove te seere
Maer elck eenen schat van duegchden vergadere+
Es een Christen gods ghebots versmadere
Hy sal metten ongheloovighen werden ghetelt+
Sijt ghy Abrahams kinderen seydt ons beradere+
Doedt Abrahams wercken uut duegchtlijcker adere
[p. 77]
Het rijcke der hemelen / dat lydt gheweldt+
De byle es aen de wortel des booms ghesteldt+
Alle boomen die draghen gheen goede vruchten+
Die selen daer neder werden gheveldt
Haer wercken selen hen volghen elck dit wel speldt+
Het sij goedt oft quaet wildt hier voor duchten
Men mach god den heere niet paeyen met cluchten
Dat gy saeydt selt ghy maeyen ketters huermalich+
Gheloove sonder wercken en maeckt niet salich+
Met vreesen en beven u salicheyt werckt+
Seydt Paulus / dwelck mijn voornemen versterckt
Ten is niet ghenoech dat wy god betrouwen
En in hem ghelooven hier wel naer herckt
Want waer dit ghenoech scriftuere aenmerckt
Waer om heet ons Christus sijn gheboden houwen+
[p. 78]
Leest in Luca / vander sondigher vrouwen
Sy werdt salich duer tgheloove maer niet alleene
Want sy liet haer ooc haer mesdaet berouwen
En uut vierigher lieften sonder vercouwen+
Wiesch sy Christus voeten / met grooten gheweene
De Niniviten geloofden / gods woordt ghemeene
Maer met berouwe elck suchte en kermde
Met asschen bespraeydt sijnde groot en cleene+
Hebben sy ghevast dus trocken sijt te beene+
God aensiende haer wercken / hy haerder ontfermde
Soo dat hy de stadt van plaghen beschermde
Dat sweerdt der wraken daer op niet en was dalich
Gheloove sonder wercken en maeckt niet salich+
TChananeesch vrouken / hadt tgheloove seer groot
Wiens dochter / vanden viandt leedt menigen stoot+
[p. 79]
Maer duer tgeloove heeft sy haer snootheyt beleden
Al versprack haer Christus sy niet en verschoot
Merckt / was haer gheloove van wercken bloot?+
Sy heeft Christum ghevolcht / geroepen / gebeden
Centurio quam ooc uut sijnder steden+
En gaf / Christo / te kennen sijns knechts ghebreck+
Was hy alleene / metten gheloove te vreden
En bleef thuys sitten segt ketters onbesneden
Die teghen de waerheyt ruerdt uwen beck?
Tcranck vrouken hadt tot Christum grooten treck+
Duer haer gheloove werdt sy ghenesen+
Ruerende Christus cleet was sy daer om geck?+
Weet ghy aen Magdalenam ooc een leck
Om dat sy / Christum salfde soo wy lesen
Dwelck Judas blameerde sijt ghy ooc van desen?+
Christus preest voor een goedt werc dus ben ic verhalich
[p. 80]
Gheloove sonder wercken / en maeckt niet salich
Prince.
Exempel hier af wilde / Christus tooghen+
Doen hy den vygheboom dede verdrooghen
Om dat hy gheen vruchten daer aen en heeft vonden
Al bestreeck hy met slijcke des blinden ooghen+
Ten was niet ghenoich maer hy moeste hem poogen
Te gane aen dwater daer hy was ghesonden
De heere heeft sijnen knechten gedeylt sijn ponden+
Den eenen min den anderen meer naer elcks weerde
Sijn begheerte was dat sij naer winning stonden+
Werden den knecht niet handen en voeten gebonden?
Die synen penningck hadt begraven in deerde
Om dat hy hem daer mede niet en gheneerde
Da vader des huysgesins ginck uutte smorgens vroech
Als die werclien in sijnen wijngaerdt begheerde+
[p. 81]
