Refereyn.
O ghy Christen menschen allegadere
Werckt vromelijck / vreest niet de helsche slanghen
Merckt dat god ons hemelsche vadere
Eenen costelijcken prijs / heeft op ghehanghen
Daer elck mensch / natuerlijck naer heeft verlangen
Beyde goedt ende quaedt naer tsegghen der clercken
Maer niemandt en sal desen prijs ontfanghen
Dan die duer tgheloove uut lieften wercken
God heeft ons gheset inder heyligher kercken
Op dat wy souden gaen doen vruchten uut minnen
[p. 82]
Hy gheeft ons sijn gratie die ons mach stercken
Siele / ende lijf / met alle onsen sinnen
Met desen penninghen / moeten wij winnen
Oft wy selen als dontrouwe knecht / ghehoont // sijn+
Ick segghe orconde / die scriftuere kinnen
Die duechdelijck werckt / sal wel gheloondt // sijn+
Ghy traghe pijndt u leden te ruerene
Siet de vader des huijsghesins es uut ghegaen
Om wercklien in sijnen wijngaerdt te huerene+
Als hyer opte merct / vele ledich sach staen
Hy straftese / duer sijn minlijck vermaen
Segghende / wat staet ghy hier ledich alden dach
Gaet heenen / werckt oec in mijnen wijngaerdt saen
Op dat ick u dat recht is gheven / mach
Apostolus / Paulus seydt sonder verdrach
[p. 83]
Niemant en werdt ghecroont / dan die wettelijc strijdt+
Als Christus de heere den vigheboom sach
Sonder vruchten / hy heeften vermaledijdt+
Werckt de wyle / dat dach es / het is nu tijdt+
Seydt / Paulus / dit woort mach qualijc verschoont // sijn
Noch seg ick den stock / die therte verblijdt+
Die duegchdelijck werckt sal wel gheloondt // sijn+
De vrucht der goeder wercken / es glorioos+
Seydt ons de wijse man / auctentijckelijck
Wilt sonder ophouden / duecht doen altoos
So ghy saeyt / soe seldy maeyen ghelijckelijck
Tsavonts riepmen darbeyders tes blijckelijck+
Gheen traghe leechgangers en hoordemen noemen+
Goede wercken loondt god int oordeel rijckelijck
Luye / traghe / sal hy dan verdoemen+
[p. 84]
Dat wij ons van onsen gheloove beroemen
Gheloove sonder wercken / es voor gode doodt
Al heeft den boom schoon bladeren / en blomen
Al niet / vint god gheen vrucht / ter uutterster noodt
Al sijn wy ghewasschen in dbloet Christi / roodt
Sal emmermeer / den hemel van ons bewoont // sijn
Wy moeten volbrenghen / al dat god gheboodt
Die duegchdelijck werckt sal wel gheloondt // sijn+
Elck maeckt nu den wech des hemels soo breedt
Tschijnt men derf niet doen dan alleene betrouwen
Maer deewighe waerheyt / seydt ander bescheedt
Wildy leven / ghy moet de gheboden houwen.+
Wandelt den nauwen wech / wildt den ruymen schouwen+
Seydt Christus / wildt sijnen raedt niet versmaden
Die naer my wildt comen / weer mans / oft vrouwen
[p. 85]
Neem sijn cruce op hem / en wandel mijn paden+
Haer wercken selen haer volghen tgoet metten quaden+
Wy moeten al voor doordeel hoe wijs / hoe vroedt
Dan sal ons god loonen uut sijnder ghenaden
Naer dat wy hebben ghewracht / weer quaet oft goet+
Niet die de wet hooren / maer diese doedt
Wert rechtveerdich dit mach uut Paulo getoont // sijn+
O vrome arbeyders grypt hier in eenen moedt
Die duegchdelijck werckt sal wel gheloondt // sijn.+
Meyndy / seydt Paulus dat god onrechtveerdich // es+
Dat hy uwen aerbeydt / sal vergheten?
Neen hy / maer8 die in duegchden / volheerdich // es
Sal namaels met Christo in vrueghden eten+
Metter maten daer ghy me meet werdy ghemeten+
De rechtveerdighe die hier in tranen saeyen
[p. 86]
Selen seydt David / vol godlijcker secreten+
Hier boven haer vruchten / met vruegchden maeyen
Hoordt scriftuere / acht niet wat ketters craeyen
Broeders seydt Petrus / voor alle saken
Weest neerstich in goede wercken wildt god paeyen+
Op dat ghy uwen roep / muecht seker maken
Hebt u als dienaers / Christi in vasten / in waken+
So muegchdy boven by dingelen ghetroont // sijn
Loopt vromelijc / op dat gy den staec muegcht raken+
Die duegchdelijck werckt sal wel gheloondt // sijn+
Prince.
Niet alle die segghen luyde oft stille+
Heere / heere / en selen salich wesen
Maer die volbrenghen mijns vaders wille
Werden salich seydt Christus / ick blijfs by desen
Wildy Abrahams kinderen sijn ghepresen
[p. 87]
Doedt Abrahams wercken elck daer toe keere+
Die duegcht doedt ghelijck wy in Paulo lesen+
Crijgcht / glorie / vrede / peys ende eere
Die eenen croes couts waters geeft / seydt de heere+
In mijnen naem eenen aermen om drincken
Sijnen loen en verliest hy nemmermeere
Ic sal hem weer levende water schincken
Doedt duecht sonder verdriet / en wildt doch dincken+
Die totten eynde volheerdt die sal gecroondt // sijn+
Laet u licht seydt / Christus / voer de menschen blinken
Die dueghdelijck werckt / sal wel gheloondt // sijn
