[p. 98]
Recht oftmen gheen god / oft gheen helle en vonde
Lutter iemandt es recht gheloovich van gronde
Maer meest elck es tot twyfelinghen ghenegen
Tquaedt heet nu goedt en men achtet voor sonde
Dat goede wercken te heeten pleghen
Men laket nu al / dat den vleesche gaet teghen
Dat den vleesche me gaet / wordt voor duecht gepresen
Dit doedt oick den muncken / haer cappen verwegen
Och waer is kerstenrijck toe bedeghen
Door Luthers doctrijne / vol erruers gheresen
Devangelie Christi werdt nu ghelesen
Van bancboeven dronckaerts roekeloose calanten
Om naer tvleesch te trecken het blijckt uut desen
Es sonde duecht de Lutheranen sijn sancten
Waerdt dat de menschen dit wel gade slaen / wouwen
[p. 99]
Elck sou hier met my / sijnen segel aensteken
Es achterclap duegcht wildt dit vermaen // cnouwen
Soo sijnt al sancten die met Luther aenhouwen
Want van niemandt / en cunnen sy wel ghespreken
Eest sonde dat wy biechten ons ghebreken
Eest duegcht / dat sy hem derren vermeten
Hoe sondich sy sijn / vol vleeschelijcker treken
Dat met eenen suchte al werdt ghequeten
Eest duegcht dat sy svrydaechs vleesch willen eten?
En eest sonde dat ander Christenen derven
Soe houdicse oick voor heylighe propheten
Eest duegcht dat sy alle weldoen vergheten
Met niet te doene den hemel willen erven
Soe machmen haren dach wel vieren / als sy sterven
Eest duegcht oncruydt in gods acker plancten
Soe dincke ick en segt oick menich werven
[p. 100]
Es sonde duegcht de Lutheranen sijn sancten.
Eest duecht in Bachus kercke groote tuegen // drincken?
Eest duegcht hoveren brassen slampampen?
En duer onsuverheyt meer dan sueghen // stincken
Eest duegcht dat sy menige stoute luegen // dincken
Paus cardinalen bisscoppen beschampen
Teghen papen en muncken roepen en stampen
Den rechten wech laten / en gaen den crommen
Eest duegcht voor tsacrament storten de lampen
En achter straten met tortsen loopen mommen
In gheestelijcke habyten met fluyten met bommen
Van broodronckenschap weetende wat beghinnen
Tgheldt verdobbelen met vollen commen
En cloosters berooven kercken en dommen
Machmen hier mede den hemel winnen
[p. 101]
Sy varen inden choor der seraphinnen
Eest duegcht datmen straft doprechte predicanten
Gods moeder veracht / sancten en sanctinnen?
Es sonde duegcht de Lutheranen sijn sancten
Eest duecht gods woort naer svleeschs berueren // trecken
Eest duegcht Devangelie te lesen quansuys?
Op dat elck daer met mach sijn valsche cueren // decken
Eest duegcht met der heyligher figueren // gecken?
De beelden te verworpen ja en theylich cruys
Venus Cupido en sulcken ghespuys
Naeckt in cameren te hanghen seer putertier
Es dit al duegcht dit maeckt my confuys
Soe behoefdemen wel eenen niewen brevier
Daer werdter vast veele ghedoodt daer en hier
Salmen die al voor Martelaers eeren
[p. 102]
Soe machmen wel schueren / den ouden calengier
Wandt daer en staen gheen sancten in dit papier
Die tgheloove bevechten en de waerheyt verkeeren
Met den Evangelie / alle duegcht verleeren
Ghelijck nu doen / dees Luthersche plavanten
Maer ic derf wel segghen voor vrouwen en heeren
Es sonde / duegcht de Lutheranen sijn sancten
Prince.
Eest dat de Lutheranen hoveerdich // blijven
In haer opinie soe sy ghewoon // sijn
Gulsich onchuysch brodroncken / aelweerdich // blijven
In dees duechden totter doodt volheerdich // blijven
Het eewich leven sal haren loon // sijn
Inden hemel daer Lucifer sal patroon // sijn
Daer selen sy snap sonder vaegchvier varen
Inden hoochsten troon / salt daer niet schoon // sijn
[p. 103]
Met Arrio Helvidio / dat ketters waren
By Hus / en Wiclef / salmense paren
Daer hen solfer en peck niet en sal missen
Daer selen sy metter duvelscher scharen
Eewelijck moeten braeyen / en kissen
Tot dat de ratten de helle uut pissen
Diet vaegchvier uut pisten hoort Luthersche quanten
Ick segghe noch eens al metter gissen
Es sonde duegcht de Lutheranen sijn sancten.
