Om dat den menschen al vryheyt werdt gheleerdt

Om dat meest elck sijn schaemschoenen heeft versleten

Om datmen sonder vreese nu god onteerdt

Om dat devotie mindert / boosheydt vermeerdt

Om dat elckerlijck wildt naeyen sijnen naet

Om dat eyghen goedtduncken scriftuere verkeerdt

Hier om gaet de weereldt al soo sy gaet

 

Om datmen oneerlijck siet in gods temple // leven+

Om dat veel menschen vanden gheloove scheyen

Om dat de gheestelijcke som quaedt exemple // geven

Om dat de blinde / de blinde leyen+

Om dat de herders hen selven weyen

Om datse alleene de wolle soecken+

Om dat de priesters / hen som gheerne vermeyen

By de ruters / metten witten doecken

Om dat regneeren / soe veel valsche boecken

Om datmen vindt soe veel Duytsche clercken

Om datmen preeckt in cameren in hoecken

Teghen de leere der heyligher kercken

Om datmen veracht alle goede wercken

Om datmen op tgheloove alleene staet

Om dat de menschen nae nieu leeringhe hercken

Hier om gaet de wereeldt al soo sy gaet.

 

Om dat de predicanten meest sijn stomme honden+

Die teghen de wolven niet en derven bassen

Om datmen nu vindt soe veel domme gronden

Die op gods streng oordeel niet en passen

Om datmen theylichdom werpt uuter cassen

Om datmen versmaedt der ouders perfectie

Om datmen doncruydt oppe laet wassen

Van jare te jare duer slappe correctie

Om dat tvleesch den gheest houdt onder subjectie

Om dat elck wilde volghen sijn sinlijcke treken

Om dat de predicanten naer haer electie

Rechtveerdicheyt swyghen bermherticheyt preken

Om dat sy niet wel en straffen de ghebreken

En haer leere niet en bewysen metter daet

Om dat esels in bonte cappen steken

Hier om gaet de weereldt alsoo sy gaet

 

Om dat gods vreese uuter weerelt gebannen // werdt

Om dat duecht alomme es donghetelde

Om dat Pharons waghen inghespannen // werdt+

Die teghen Israel cloeck wildt te velde

Om datmen nu cloosters breeckt met ghewelde

Om datmen verdrijft gheestelijcke persoonen

Om datmen ketters laet afcoopen met ghelde

Om dat de cruys bruers alle mesdaet verschoonen

Om dat justitie moet inden torf hoeck woonen

Want twee die een ghelijck feydt hebben bedreven

Deen gaet vry mach hy wel duymcruydt toonen

En dander moet sterven / mach hy niet gheven

Hoe compt dat de menschen dus beestelijck leven

Om dat tsweert der correctien niet stijf en slaet

Om dat thooft cranc es de leden sneven

Hier om gaet de weereldt alsoo sy gaet

 

Om dat de Christenen naer tijtelijc jolijt // haken

En Christum sijn cruys laten draghen alleene

Om dat de Princen naer eyghen profijt // waken+

Om datter weynich god soecken oft gheene

Om datse derm puepel som villen totten beene

Op datse mueghen wesen groote cadetten

Om dat overspel heensdaechs es so ghemeene

Om dat sijt selve doen diet souden beletten

Om datmen maeckt veel statuten en wetten

Om datter soo luttel werdt onderhouwen

Om dat de weereldt es vol duvels netten

Om datter soo weynich sijn diese schouwen

Om dat cleyn schaemte es onder de vrouwen

Om dat de maechden hebben een stout ghelaet

Om dat wy gheen van al en doen so wy souwen

Hier om gaet de weereldt al soo sy gaet

 

Om dat wi weynich nae eens anders hinder // vragen

Om dat wy malcanderen niet en beminnen

Om dat vuylkens houwen / kinder / kinder // draghen

Om dat jonghe leckerckens kindren winnen

Om dat sy sonder godts vreese beghinnen+

Om dat douders haer kindren qualijck bewaren

Om dat sy hen jonck / god niet en leeren kinnen

Om datse te seere de royen sparen

Om dat tvolck booser werdt van jaren te jaren

Om datmen vindt soo veel niewe sneden

Om dat elck grooten rijckdom wildt vergaren

En niemandt met den sijnen en es te vreden

Om dat discoort regneerdt in dorpen in steden

Om dat dlant gheregheerdt werdt duer jonghen raet

Om dat wille / en fortse / nu heeten beden

Hier om gaet de weereldt alsoo sy gaet

 

Om dat elck tstof uut eens anders ooge trecken // wilt+

Om dat nyemandt den balck in sijn ooghe en siedt

Om dat elc sijn boosheyt met scriftueren decken // wilt

Om dat den sacramente veel schanden gheschiet

Om datmen doncruydt niet uute en wiedt

En gods eere en voordert niet met allen

Om datmen gods dieneers gheen eere en biedt

Om dat de wijfs van scriftueren rallen

Om datmen dautaren laet vervallen

Om datmen huysen maeckt ghelijc casteelen

Om datmen de kercken laet ligghen als stallen

Om dat boeren hen nu syden en flueelen

Om dat de rijcke vrecke eet lecker morseelen

Daghelijcx sijnen buyck daer mede versaet

Den armen Lasaro niet met en wildt deelen+

Hier om gaet de weereldt alsoo sy gaet

Om dat groote borsen by een hoopen tgoedt

Niet achtende wient schaeyt als sy mueghen rijcken

Om dat tfutselboeck leerdt diversche practijcken

Waer duer menich om deertsch goet sijn siele waecht

Om datmen fraude in comanschap siet blijcken

Om dat eyghen bate tghemeyn profijt verjaecht

Om dat Judas nu weer de borse draecht

Om dat dambachts man duer niewe inventie

Practijcke leerdt om winnen hoet god meshaecht

Om dat meest elck heeft een ruym conscientie

Om dat gulsicheydt verdrijft abstinentie

Om datmen tgebodt gods en der kercken versmaet

Om dat luttel iemandt doedt penitentie

Hier om gaet de weereldt alsoo sy gaet.