[p. 141]
Een nieu Evangelie naer sijn vermeten
Dwelck de ratten / beter hadden gheten
Dan dat hy daer soo jammerlijc / me heeft bedrogen
De simpel menschen die niet bet en weten
Waer hy niet metten viandt beseten
Hy en hadt teghen de waerheyt soo niet gheloghen
O rooden draeck wat hebdy venijns ghespoghen
Al kerstenrijck dore onder leecke en clercken
Met uwen steerte hadt ghy naer u ghetoghen
Het derdendeel der sterren hadt ghyt vermoghen+
Maer neen ghy die consten u boosheyt wel mercken
Maer de vleeschlijcke menschen hebt gy doen hercken
Naer u vleeschlijcke leere dat sy tot u vlien
Al spotmen metter heyligher kercken
Tmach al naer Luters Evangelie gheschien
[p. 142]
Hy heetse hypocryten die tvleesch castijen
Suverlijc leven / vasten bidden / waken
Maer dat de priesters uut sijnder ketterijen
Wijven trouwen dat mach hy wel lijen
Op datse veel jonghe Luteraenkens maken
En dat de muncken haer oorden versaken
Loopen als dulle Apostaten verwaten
Tot sy ooc erghens aen een wijf gheraken
Dit prijst hy al / Tian sou hijt ooc laken?
Soo soude hy ooc moeten sijn nonne laten
Datmen de muncken naer roopt achter straten
De leecke de priesters met vingheren wijsen
Datmen doverste veracht van beyden staten
Dat sijn discipulen alle menschen haten
Die haer ketterije / niet en prijsen
Dat dondersaten teghen de heeren op rijsen
[p. 143]
Datse niet en achten haer heeten oft verbien
Datmen den steden steelt haer axcysen
Tmach al naer Luters Evangelie // gheschien
Tes alleleens weermen wel oft qualijck // doedt
Wandt ons wercken en acht god niet een spaenken
Eest wonder dat hem tvolc tot duechden dralijc // spoedt
Want weldoen es sonde maectmen hem nalijc // vroedt
Watmen doet alsmen ghelooft / tes al claer baenken
Men derf niet biechten oft weenen een traenken
Christus heeft voldaen / elck wildt vercloecken
Dees tydinge craeydt ons TWittenberchs haenken
Al maecktmen ooc somtijts een jonck Luteraenken
Daer knechtkens vergaert sijn en witte doecken
Daermen Devangelie leest in hoecken
Luter maeckt gheen sonde / van selcken dinghen
[p. 144]
Die den Paus can beschimpen / blameren vloecken
En veel blasphemien uuter mouwen soecken
Teghen bisscoppen prelaten sonderlinghen
Vanden muncken veel lueghenen can by bringhen
Dit sijn in Luters secte al gheleerde lien
Hoe sy scriftuere / met ketterijen minghen
Tmach al naer Luters Evangelie gheschien
Noyt ketterije meer tot sonden verwecte
Want sij consenteerdt den vleesche al sijn ghelieven
Al doetmen overspel eest int bedecte
Tmach wel passeren / naer Luters secte
Dat susterkens bruerkens malcanderen gherieven
Roffiaens / bancboeven / jae rechte kerck dieven
Die kelcken stelen en cyborien breken
Roovers snaphanen die elcken grieven
[p. 145]
Die steden dreyghen met valschen brieven
Die kercken / en cloosters aen willen steken
Muytmakers die met verraders treken
Haer handen in donnosel bloedt willen netten
Op datse Luters lachter mochten wreken
Dese hoortmen de scriftuere preken
In schepen op waghenen in Caboretten
Al doetmen gheen duecht / al wiltmense beletten
In ander menschen en noch bovendien
De beelden breken de vierdaghen af setten
Tmach al naer Luters Evangelie gheschien
Lieghers / bedrieghers / bancqueroetieren
Die eest recht / eest crom / gheerne spelen binnen
Monipoliers / woeckenaers / financieren
Uutsupers der aermen groote ghieren
[p. 146]
Die daghelijcx haer gheldt leenen om winnen
Die alle dinck sonder gods vreese beghinnen
God met eenen sucht wanen paeyen ten ende
Die noch god / noch duecht / noch sonde en kinnen
Dit sijnse die Luters secte beminnen
Want al dat onghevreest es / diendt onder dees bende
Om vrylijc te sondighen sonder emende
Men derf niet restitueren laet lortsen en lueren
Tgoedt es ghemeene hoe ict keere oft wende
Ic laet my duncken dat meest al de ellende
Die wy heden sien / comt uut Luters errueren
De duvel en derf de menschen niet becueren
Luter scherpt in desen wel sijn Ingien
Hoemen scriftuere siet recken en schueren
Tmach al naer Luters Evangelie gheschien
[p. 147]
Men hoordt de Luteranen roepen en stampen
Op tschieraet der kercken daer sy niet aen en ghellen
Sy blasen de keersen uute ende de lampen
Voor tsacrament opten aflaet sy schampen
Segghende de duvel woondt in de calfs vellen
Dit volcxken twyfelt ooc vander hellen
Ofter een es / en segghen tvaechvier es uut ghepist
Sy spreken blasphemien te boos om vertellen
Van tsacrament des outaers / hoordt dees ghesellen
Sy segghen die misse hoort / dat hy gods lichaem mist
Die tot gods dienst yet gheeft dat hijt verquist
Dat de ratten dwywater uut hebben gedroncken
Dits de leere vanden vijfsten Evangelist
Te Wittenberghe die alomme rockt twist
Tbreeckt nu uute dat langhe heeft ligghen voncken
Twassen selden goey vruchten uut quaden troncken
[p. 148]
Al laetmen doncruydt op groeyen sonder wien
Al werdt metter scriftueren venijn gheschoncken
Tmach al naer Luters Evangelie gheschien
Men straft de predicanten / alle daghe
Preken sy goey wercken oft penitentie
So eest god gheve den pape de plaghe
De schelm liechter ane duer sijn diefs craghe
God gheve den munc12 de pestilentie
De duvel hael den wolf dits de reverentie
Diemen den predicanten doet naer Luters lesse
Maer preecter yemandt naer sijn inventie
Alleen van tgheloove / makende gheen mentie
Van Christelijcke wercken int expresse
Al waerdt een bancboeve met eenen langhen messe
Gaeve hy den hemele goede coop
[p. 149]
Tvolck hinghe hem ane ghelijck een clesse
In sijn sermoonen al preeckte hijer sesse
Al waert over een myle hy creghe den loop
Dits de devotie vanden Luterschen hoop
Al waert dat sy landen en steden verrien
Om haer secte te stercken hier leydt den cnoop
Tmach al naer Luthers Evangelie gheschien
Al eetmen svrydaechs eenen ghebraden capuyn
Ja al waert in de vasten tmach al passeren
Al nemen de Nonnekens duer tvleesch ocsuyn
Datse haer wielen hanghen opten tuyn
Uuten cloosters loopen en gaen hen verweren
Luters Evangelie salt consenteren
Al verachtmen alle Sacramenten
Al wiltmen gods moeder alle santen blameren
[p. 150]
Luter sal hier af lichtelijc absolveren
Al maectmen bordeelen van gheestelijcke conventen
En al willen ooc sijn adherenten
Met gheestelijc goedt haer kisten vullen
Al doen sy figueren schilderen oft prenten
Teghen tgheloove daer sy den innocenten
Duer duytwendich ghesichte me verdullen
De Paus van Wittenberghe verleent sijn bullen
Dat sy selc werc sonder sonde mueghen bespien
Al sietmen de waerheyt bedecken behullen
Tmach al naer Luters Evangelie gheschien
Luter belooft sijnen discipulen hier vryheydt
Naemaels den hemel van duechden hoe povere
Hoe wel dat hyse ter hellen / vast by // leydt
Sy houdendt voor Evangelie / dat hy // seydt
[p. 151]
Al eest een dronckaert een brasser een hovere
Tgheloove es de ponte diet al set overe
En Luters gheloove gaet lancx soo manckere
Eerst riedt hy den muncken dees schoon belovere
Een wijf te trouwen nae maeckt hijt grovere
Hy moest ooc een hebben aerm Venus janckere
Siet ghy niet hoe hy steect sijnen stanckere
Aerm dwasen diet met hem houdt soo vaste
Sijn leere cruypt voordt ghelijc den cankere
Meerdt ghy u schip aen desen Anckere
Ghy blijft uutter havenen daer eewich es raste
Keerdt haestelijc u roer trecket seyl ten maste
Voor god en de heylighe kercke buycht u knien
Al waert datmen deen boosheyt op dander taste
Tmach al naer Luters Evangelie gheschien
[p. 152]
Princelijcke doctoren vanden quaertspele
Die geen duecht en muecht sien sonder verthoornen
Al hebic hier verteldt van uwen aert // vele
Nochtans ic noch het meeste paert // hele
Hoe dat ghy nu queldt / gods uutvercoornen
Ghelijck de rooskens staen onder de doornen
Staen de kinderen der kercken / tallen weghen
Onder de ketters die als gheswoornen
De beeste aenhanghen metten thien hoornen
Sijnde uuten poel van Wittenberghe ghesteghen
De welcke / heeft eenen mondt ghecreghen
Daer veel blasphemien mede werdt ghesproken
En die alle gods dienst sou spreken tegen
Doude ketterije begraven gheleghen
Sou opheffen en duer sijn blasen weer stoken
Tvier onder der ketters asschen ghedoken
[p. 153]
Dwelck nu onblusschelijc brandt / soomen mach sien
Maer wat boosheyt de Luteranen coken
Tmach al naer Luters Evangelie gheschien
