Refereyn.
GHy die alle staten der weerelt begrijpen // wilt
Ghy die de kercke wildt reformeeren
Ghy diet al doen dansen naer u pijpen // wildt
En u selven niet en cunt gheregeeren
Ghy die in eens anders boeck gaet studeeren
En uus selfs lesse nemmermeer en vest
Ghy die de gheestelijckheyt reprobeeren
Ghy die papen en muncken wildt accuseeren
En selve beschijt uwen eyghenen nest
Ghy die u ooghen laet draeyen oost en west
Op u prelaten en haer ghebreken becraeydt
Besiet u selven eerst dat is u best
[p. 162]
Wat trect ghy u ane dat u niet en schaeyt
Peynst elc sal maeyen dat hy heeft ghesayt+
God en sal u naer eens anders werc niet vragen
Dus corrigeerdt u selven dinct en weest gepaeyt
Een yegelijc sal sijns sel[f]s pacxken dragen+
Wilt uwen sondigen gront uut delven // net
En laet eenen anderensijn hoveken wien
Eer ghy yemandt begrijpt merct wat u selven // let
Ghy leecke die der priesters crancheyt bespien
Wilt u eyghen conscientie wel duersien
En merct wat daer inne staet gescreven
Ic sorge ghy vint u ooc schuldich in dien
Ja sout al blijcken het soude messchien
Veel leeclijcker luyden dat ghy hebt bedreven
Ghy en selt voor de papen geen reden geven
[p. 163]
Sijt te vreden gheven sy u goede leere
Neemt dit voor u en laet hen tquaet leven
Beveelt haer oordeel den oppersten heere+
Maer elc sijn ooghen op hem selven keere
En mercke wat gode in hem mocht meshagen
En siet op malcanderen niet dus seere
Een yegelijc sal sijns selfs pacxken draghen+
Nonnen / begynen / papen / en muncken // ooc
Ja Paus / Bisschoppen / en Cardinalen
Abten proosten / dekens / canuncken // ooc
Hoortmen alomme duer den mostaert halen
De weerlijcke seggen de geestelijcke dwalen
Sy roepen op der priesters simonije
Maer hoe sy voor god haer schuldt selen betalen
En sorghen sy niet hoe seer sy falen
[p. 164]
Duer ghiericheyt oncuysheyt oft hoverdije
Sy segghen wel vander papen boeverije
Hoe datse houden haer concubynen
Maer al stelen sy selve een brockxken opt sije
Duer biechte sy dit niet te beeteren en pijnen
Elck heeft ghenoich te doene met den sijnen
Wat willen wy dan over malcandren claghen
Sijn papen en muncken niet soe sy schijnen
Elck meersman die sal voor sijnen corf // staen
Ghy wildt de papen haer ghiericheyt verwyten
En der ermer lien bloet selve in uwen slorf // slaen
Om eyghen bate / uwen broeder beschyten
Oft de papen wel leefden wat soudt u profyten
Arm dwasen als ghy selve weldoen versaeckt
[p. 165]
Dus liet ghy beeter u roepen u crijten
Want ghy muecht u tonghe vaste verslijten
Met segghen ghijs doch niet beter en maect
Twaer best dat ghy u eyghen schult eerst spraeckt
Wildt ghy yemandt beteren aen u selven beghindt
Wandt tgheene dat ghy in andere laeckt
Ghy oic dicwils in uus selfs boesen vindt
Maer om dat niemandt hem selven en kindt
So ergert de weereldt / van daghen te daghen
Dus dinckt eer ghy u / yemandts leven onderwindt
Een yeghelijck sal sijns selfs pacxken draghen.+
Prince.
Ghy die soe nydich op muncken en papen // sijt
En selve sijt tot alder boosheyt gheneghen
Als grijpende wolven uut om raepen // sijt
Van niete tot grooten rijckdom bedeghen
[p. 166]
Duer woeker finantie tgoet hebt gecregen
Daer op ghy draecht sijde flueel en damast
Wanneer ghy eens anders mesdaet wilt wegen
Neemt eerst douwe en legtse daer tegen
Want elc sal dragen sijnen eyghenen last
Wat helpt u dat ghy eens anders pols wel tast
Medicijn maect eerst u selven gesondt+
Oversiedt u rekeninge somtijts alst past
Ghy vint u schuldich wel thien duysendt pondt
Tast papen / en muncken niet soe diepe inden mondt
Al siet ghijse duer crancheyt vallen met vlaghen
Peynst in u selven en segt goedt rondt
Een yeghelijc sal sijns selfs pacxken draghen+
